"Роля Мінюста як кантралюючага органа не можа існаваць асобна ад рэпрэсій"
Павел Сапелка
Праваабаронца «Вясны» Павел Сапелка каментуе першыя вынікі пазачарговай пераатэстацыі адвакатаў, распачатай 12 верасня Міністэрствам юстыцыі.
Сёння адвакат са шматгадовым стажам Ганна Бахціна, якая ў розныя гады бараніла фігурантаў палітычна матываваных крымінальных спраў, паведаміла, што камісія Міністэрства юстыцыі прыняла рашэнне аб тым, што яна больш "не можа працаваць на пасадзе адваката ў сувязі з недастатковай прафесійнай кваліфікацыяй". Яна стала першай ахвярай. У спісах на пераатэстацыю значацца яшчэ некалькі абаронцаў грамадзянскіх і палітычных актывістаў, у дачыненні да якіх праваабаронцы выказваюць асаблівую занепакоенасць.
«З глыбокім шкадаваннем трэба сцвярджаць, што ў практыку ўмяшання органа выканаўчай улады - Міністэрства юстыцыі - у дзейнасць адвакатуры вярнуліся карныя элементы, прадбачліва закладзеныя ў адпаведны закон. Крытыкуемая праваабаронцамі роля Міністэрства юстыцыі як кантралюючага органа не можа існаваць асобна ад рэпрэсій, закліканых падтрымліваць адсутнасць фармальна дэклараванай незалежнасці адвакатуры і адвакатаў.
Тое крохкае перамір'е, якое ўсталявалася пасля разгрому адвакацкіх свабодаў у 2011 годзе коштам адмовы адвакатаў ад многіх уласцівых гэтай прафесій правоў і гарантый, а органамі адвакацкага самакіравання - ад функцыі абароны іх законных інтарэсаў, пала, пахаваўшы нясмелыя надзеі на перспектывы аднаўлення ролі і прэстыжу адвакацкай прафесіі.
Роля адвакатуры ў грамадстве ацэньваецца значна шырэй, чым роля простага прафесійнага аб'яднання. Гэты інстытут закліканы ўраўнаважваць ролю публічнага, дзяржаўнага ўплыву на праваадносіны; адвакат і яго дзейнасць, свабодная ад усякага роду ціску і пагрозаў, - найважнейшы элемент гарантаванага кожнаму справядлівага суда. Безуважна назіраючы за пазбаўленнем адвакатуры ўласцівых ёй незалежнасці і свабоды, грамадства страціць нават той мінімум правоў і гарантый, які пакінула яму рэпрэсіўная палітыка дзяржавы.
Ані не сумняюся, што пазбаўленне права на прафесію асобных адвакатаў звязанае выключна з іх актыўнай пазіцыяй і ўдзелам ў справах, якія маюць грамадскі рэзананс і звязаныя з палітычна матываваным пераследам грамадзянаў», - піша праваабаронца.
Дададзім, што напярэдадні пазачарговай пераатэстацыі шэрагу адвакатаў ПЦ "Вясна" звярнуўся да Спецыяльнага дакладчыка ААН па пытанні аб незалежнасці суддзяў і адвакатаў з просьбай умяшацца ў сітуацыю, а таксама заклікаў міжнародную адвакацкую супольнасць да салідарнасці з беларускімі калегамі.
