У Мінску затрымалі актывістаў “Моладзі БНФ” і асудзілі да штрафаў Дапоўнена
Мікіта Краснакуцкі.
У Мінску 14 сакавіка супрацоўнікі міліцыі затрымалі дваіх актывістаў “Моладзі БНФ”.
Па інфармацыі яшчэ аднаго актывіста, іх адвезлі ў Першамайскі РУУС. Прозвішча аднаго затрыманага Мікіта Краснакуцкі, а другога – Мікалай Логвінаў. Меркавана, яны раздавалі мінакам нацыянальную сімволіку.
Cтала вядома, што на юнакоў склалі пратаколы адміністрацыйнага правапарушэння, зараз яны ў судзе Першамайскага раёна Мінска.
Мікалая Логвінава вінавацяць па арт. 23.34 КаАП "Удзел у несанкцыянаваным масавым мерапрыемстве" за тое, што хлопцы 10 сакавіка распаўсюджвалі стужачкі з нацыянальным арнаментам і ўлёткі з заклікамі далучыцца да акцыі супраць дэкрэта №3, якая плануецца на 25 сакавіка. Справу разглядае суддзя Анастасія Папко.
- Мікалай Логвінаў у судзе
Мікалай Логвінаў у судзе віну прызнаў, папрасіў суд вынесці папярэджанне або штаф. Яго паплечнік - Мікіта Краснакуцкі, якога таксама судзяць у гэты час, паступіў аналагічным чынам - прызнаў віну цалкам.
Суддзя вынесла рашэнне пакараць Мікалая Логвінава штрафам у пяць базавых велічынь.
Мікіту Краснакуцкага таксама асудзілі да штрафу ў пяць базавых велічынь. Судзіў Юры Гарбатоўскі.
