У Наваполацку судзяць сына бабруйскага блогера Алега Жалнова Дапоўнена
Аляксей Мілюкоў з бацькам Алегам Жалновым
Сёння ў судзе горада Наваполацка пачынаецца разгляд крымінальнай справы, заведзенай на сына бабруйскага блогера Алега Жалнова — Аляксея Мілюкова (Жалнова), які адбывае трохгадовае пакаранне ў Наваполацкай папраўчай установе адкрытага тыпу №15. Яго перавялі сюды летась у жнiўнi з гомельскай ПУАТ-22 (Папраўчая ўстанова адкрытага тыпу). Аляксея вінавацяць па артыкуле 415 Крымінальнага кодэкса РБ «Ухіленне ад адбыцця пакарання ў выглядзе абмежавання волі», якое выявілася ў парушэннях рэжыму ўтрымання.
Усяго пад час адбыцця пакарання ў папраўчых калоніях адкрытага тыпу з ліпеня 2014 года да нядаўняга часу Аляксей Мілюкоў (Жалноў) атрымаў 8 спагнанняў. Бацька Аляксея лічыць, што многія спагнанні выносіліся па неістотных прычынах, фармальна, з мэтаю паўплываць на бацьку, які выкрываў супрацоўнікаў бабруйскай міліцыі, што парушаюць закон і змяшчаў у сеціве пра гэта відэаролікі.
Нагадаем, у ліпені 2014 Аляксей Жалноў быў асуджаны на тры гады "хіміі" і атрымаў штраф – 50 мільёнаў рублёў. Суд прызнаў яго вінаватым у нанясенні маральнай і фізічнай шкоды супрацоўніку ДАІ.
За ходам судовага працэсу назіраюць прадстаўнікі Праваабарончага цэнтра "Вясна". Суддзя Пётр Леўчанка абвясціў пра пачатак судовага паседжання. У залі – прадстаўнік абвінавачвання, адвакат, прадстаўнікі дэмакратычнай супольнасці Наваполацка, журналісты. Аляксея Мілюкова трымаюць пад вартай.
Аляксей Мілюкоў адразу заявіў некалькі хадайніцтваў. Адно з іх - і найбольш істотнае - дапусціць у якасці абаронцы па справе у суд свайго бацьку, Алега Жалнова. Суд з гэтым не пагадзіўся. Тады Аляксей Мілюкоў адмовіўся ад паслуг прызначанага адваката і папрасіў час, каб заключыць дамову з адвакатам, якому ён давярае.
Яшчэ адно хадайніцтва тычылася дазволу на вядзенне відэа і аўдыёзапісу. У відэазапісу было адмоўлена, а аўдыёзапіс сваякам абвінавачанага можна весці і без рашэння суддзі. Аляксей Мілюкоў задаў пытанне: "Як гэты запіс суд зможа далучыць да матэрыялаў справы і як яго параўнаць з пратаколам паседжання, які вядзе сакратар суда?". Суддзя паабяцаў адказаць на гэтае пытанне на наступным паседжанні, якое прызначанае на 23 жніўня.
