Суд над Вячаславам Сіўчыкам працягнецца 3 траўня
Вячаслаў Сіўчык. Фота Радыё Свабода.
У Цэнтральным судзе Менску 21 красавіка працягваўся разгляд адміністрацыйнай справы кіраўніка руху салідарнасьці «Разам» Вячаслава Сіўчыка.
Сіўчыка вінавацяць паводле двух артыкулаў Адміністрацыйнага кодэксу — аб хуліганстве і непадпарадкаваньні супрацоўнікам міліцыі.
Першае паседжаньне ў гэтай справе адбылося 19 красавіка. У той дзень суд вярнуў на дапрацоўку ў РУУС Цэнтральнага раёну складзеныя на Сіўчыка пратаколы.
Увечары 20 красавіка супрацоўнікі міліцыі зноў падпільнавалі Вячаслава Сіўчыка ў падʼезьдзе ягонага дому, уручылі копіі новых пратаколаў і позву на судовае паседжаньне 21 красавіка.
На судовыя слуханьні зьявіліся здымачныя групы дзяржаўных тэлеканалаў. Аднак падчас працэсу спадар Сіўчык хадайнічаў аб пераносе разгляду, бо ягоны адвакат зьехаў у камандзіроўку. Судзьдзя Вікторыя Шабуня хадайніцтва задаволіла і перанесла пасяджэньне на 3 траўня.
Вячаслаў Сіўчык сказаў:
«Ніякіх адміністрацыйных правапарушэньняў я не чыніў, і справа гэтая палітычная. Аднак улады хочуць ператварыць яе ў „хуліганку“, таму гэтак сьпяшаюцца».
