У Баранавічах пачаўся збор подпісаў супраць расійскай авіябазы

У Баранавічах прадстаўнікі палітычных партый і недзяржаўных грамадскіх арганізацый распачалі збор подпісаў супраць размяшчэння расійскай авіябазы ў Беларусі.

– Артыкул 18 Канстытуцыі абвяшчае, што Рэспублікі Беларусь ставіць за мэту зрабіць сваю тэрыторыю без’ядзернай зонай, а дзяржаву – нейтральнай. Мы лічым, што размяшчэнне расійскай авіябазы на нашай зямлі пярэчыць нашай Канстытуцыі і настроям людзей. Нашыя грамадзяне хочуць жыць з суседзямі ў міры і згодзе, а не ў канфліктах і канфрантацыі. Таму мы вырашылі сабраць як мага болей подпісаў і накіраваць іх у дзяржаўныя органы, каб падкрэсліць, што мы не хочам, каб наша тэрыторыя выкарыстоўвалася ў ваенных мэтах супраць нашых суседзяў. Мы асабліва імкнемся адзначыць, што беларусы супраць таго, каб нашыя дзеці ваявалі за межамі сваёй тэрыторыі і за чужыя інтарэсы, – паведаміў актывіст Руху “За свабоду” Віктар Сырыца.

Грамадскі актывіст дадаў, што падзеі ва Украіне і асабліва ў Сірыі надаюць упэўненасці ў неабходнасці супрацьдзеяння размяшчэнню расійскай авіябазы ў Беларусі.