Баранавічы: зарэгістраваны першыя 6 ініцыятыўных груп

У малой зале гарвыканкама 13 студзеня адбылося чарговае пасяджэнне Баранавіцкай гарадской тэрытарыяльнай выбарчай камісіі, якая разглядала пададзеныя дакументы на рэгістрацыю ініцыятыўных груп па збору подпісаў за вылучэнне кандыдатамі ў дэпутаты гарадскога Савета дэпутатаў. ТВК зарэгістравала ўсе 6 пададзеныя на той момант заявы грамадзян і іх ініцыятыўныя групы. Збіраць подпісы за вылучэнне ў якасці кандыдатаў у дэпутаты збіраюцца 3 прадстаўнікі кампаніі “Гавары праўду” Вячаслаў Болбат, Віктар Цяпін і Зміцер Малочка, сябра палітычнай партыі “Справядлівы свет” – Чэслаў Гузоўскі. Шляхам збору подпісаў збіраецца вылучацца і грамадскі актывіст Рыгор Грык. Адносна шостага пртэндэнта, які зарэгістраваў сваю ініцыятыўную групу, вядома толькі імя і прозвішча – Валянцін Цыганкоў. Баранавіцкім актывістам невядомая ягоная грамадская і палітычная дзейнасць, а паведаміць хаця б ягонае месца працы сябы ТВК адмовіліся.

Наступнае пасяджэнне, як адзначылі ў Баранавіцкай ТВК, адбудзецца па меры паступлення новых заяваў грамадзянаў горада.

Фота: пасяджэнне Баранавіцкай гарадской ТВК 13 студзеня 2014г.

“Праваабаронцы за свабодныя выбары”