Ярмошына: Часы адміністрацыйнага рэсурсу на выбарах прайшлі
Лідзія Ярмошына, старшыня Цэнтрвыбаркама
Нечаканае прызнанне зрабіла неўязная ў ЕЗ кіраўніца ЦВК Беларусі.
Лідзія Ярмошына папрасіла ідэолагаў дапамагчы загнаць людзей на выбарчыя ўчасткі і сказала, што «часы адміністрацыйнага рэсурсу» даўно прайшлі, перадае БелаПАН.
Адна з галоўных задач ідэалагічнай вертыкалі ў ходзе цяперашняй выбарчай кампаніі ў мясцовыя Саветы - актыўная праца па прыцягненні грамадзянскага насельніцтва да ўдзелу ў выбарах, адзначыла Ярмошына.
«Хаця згодна з дзеючым заканадаўствам выбары ў мясцовыя Саветы дэпутатаў адбудуцца пры любой яўцы выбаршчыкаў, а кандыдатам трэба набраць для перамогі ўсяго толькі большасць галасоў, мы павінны разумець, што ад нашай актыўнасці, ад таго, каго мы вылучым і абярэм, будзе залежаць і наша з вамі будучыня. У мясцовыя Саветы павінны прыйсці годныя людзі, якія маюць за плячыма жыццёвы вопыт, жаданне працаваць на карысць канкрэтнай тэрыторыі і паляпшэння жыцця людзей», - лічыць Лідзія Ярмошына.
Далучаць людзей у выбарчую кампанію ні ў якім разе нельга прымусова, альбо выкарыстоўваючы адміністрацыйны рэсурс, адзначыла кіраўніца ЦВК.
«Такія часы даўно прайшлі. Галоўны ўпор трэба зрабіць на тлумачальную працу ў працоўных калектывах, выступленні і інфармаванне праз інтэрнэт і СМІ», - сказала старшыня Цэнтрвыбаркама.
