Журналіста Сержука Серабро хацелі пабіць цаглінай
Неадэкватны начальнік атакуе журналіста. Фота С. Серабро.
5 ліпеня фотакарэспандэнт інтэрнэт-газеты "Народныя навіны Віцебска"Сяржук Серабро рыхтаваў фотарэпартаж пра наступствы моцнага ліўня, які прайшоў напярэдадні ў Віцебску. У прыватнасці, яго зацікавіла яма, якая ўтварылася ў самым цэнтры горада, насупраць гандлёвага цэнтра "Марка-сіці".
Як піша tut.by, каля правалу працавала група будаўнікоў. Раптам адзін з іх, як высветлілася пазней, начальнік аб'екта па будаўніцтве падземнага пераходу, прадстаўнік менскага прадпрыемства "Рэмсэрвісбуд" Аляксандр Балахін, пачаў паводзіць сябе, мякка кажучы, дзіўна. Яму не спадабалася, што дзеянні рабочых здымае фотакарэспандэнт "ННВ", і ён з тратуарнай пліткай у руцэ кінуўся да журналіста, пагражаючы стукнуць яго гэтай пліткай, калі фотаздымка ня будзе спыненая.
Пры гэтым разгневаны начальнік аб'екта нецэнзурна лаяўся, паказваў на будынак гарвыканкама, якое размяшчаецца побач, і крычаў даслоўна наступнае: "Мэр загадаў вам такі п.. Ды даць! Вы тут ужо нарабілі дзялоў!"
Як падзяліўся Сяргей Серабро, у яго журналісткай практыцы адбывалася ўсякае, у тым ліку было шмат выпадкаў, калі чыноўнікі ці міліцыя перашкаджалі яму выконваць свае прафесійныя абавязкі. Але фізічнай расправай рэдактару віцебскага незалежнага выдання пагражалі ўпершыню.
