Баранавічы: прадпрымальнікі страйкуюць, супрацоўнікі міліцыі спрабавалі затрымаць Мікалая Чарнавуса
Большая частка прадпрымальнікаў баранавіцкіх рынкаў 2 ліпеня не выйшла на працу, падтрымаўшы страйк, абвешчаны 1 ліпеня.
Як паведаміў прадпрымальнік і грамадскі актывіст Мікалай Чарнавус, зачыненыя і не працуюць каля 500 ралетаў на Цэнтральным “Баранавіцкім каапрынку” (вул. Чарнышэўскага, 11) і такая ж колькасць на “Палескім кірмашы” (вул. Фралянкова, 46).
– Учора быў стыхійны сход каля гарадской падатковай інспекцыі і ўсе прагаласавалі, што не выйдуць працаваць 2 ліпеня. Але некаторыя не стрымаліся, адмовіліся ад удзелу ў страйку і сёння выйшлі на працу, – паведаміў Мікола Чарнавус.
Калі Мікалай Чарнавус 2 ліпеня зайшоў на Цэнтральны рынак і стаў размаўляць з тымі прадпрымальнікамі, якія сёння працуюць, то да яго адразу падбеглі некалькі міліцыянераў. Імі камандаваў вядомы сваім удзелам у разгоне апазіцыйных акцыяў маёр міліцыі Павел Кульгавік. Міліцыянеры ўзялі спадара Чарнавуса пад рукі і прапанавалі «прайсці з імі». Але, як распавёў Мікалай Чарнавус, адразу ж сабралася некалькі дзясяткаў прадпрымальнікаў, якія адбілі яго ў супрацоўнікаў міліцыі.
Пасля гэтага Мікалай Чарнавус сышоў з рынку.
