Павел Сапелка: Яшчэ ў 2011-м мы прадбачылі з’яўленне “шпіёнскіх спраў” актывістаў

Да такой высновы юрысты прыйшлі пасля аналізу прапанаваных зменаў у крымінальнае заканадаўства.  Пра гэта Еўрарадыё распавёў юрыст Павел Сапелка:

“У тым аналітычным заключэнні мы звярталі ўвагу на тое, што змены, якія былі ўнесеныя ў Крымінальны кодэкс і якія значна пашырылі паняцце “здрады радзіме”, выглядаюць на магчымы інструмент прыцягнення да крымінальнай адказнасці проста за грамадскую актыўнасць. Жыццё пацвердзіла, што мы былі правыя”.

Па словах Сапелкі, той характар абвінавачванняў, якія прад’яўленыя Гайдукову, не пакідаюць месца для сумневаў у тым, што гэтая справа палітычна матываваная. І служыць папярэджаннем усім грамадскім актывістам і засцерагае іх ад любых форм кантактаў з замежнымі арганізацыямі.  

Нагадаем, 12 чэрвеня ў Віцебску распачаўся закрыты суд над грамадскім актывістам з Наваполацку Андрэем Гайдуковым. Хлопца вінавацяць у “навязванні Рэспубліцы Беларусь палітычнага курсу, які не адпавядае яе нацыянальным інтарэсам, што шукаў фінансаванне на сваю дзейнасць у фондзе пасольства ЗША і ў закліках да кропкавых санкцыяў”. За здраду радзіме хлопцу пагражае да 15 гадоў турмы.