Актывісты Маладога Фронту зьвярнуліся ў КДБ з патрабаваньнем вярнуць канфіскаваную падчас ператрусаў прыватную аргтэхніку
Маладафронтаўцы Зьміцер Хведарук, Барыс Гарэцкі, Аляксей Янушэўскі й Настасься Палажанка зьвярнуліся да сьледчых ворганаў Камітэту дзяржаўнай бясьпекі з патрабаваньнем неадкладна вярнуць сканфіскаваную прыватную аргтэхніку (сістэмныя блокі).
Нагадаем, што 4 лютага падчас ператрусаў на кватэрах маладафронтаўцаў, праведзеных сьледчай групай пад кіраўніцтвам капітана КДБ "Свистуна Дмитрия Михайловіча", у актывістаў Маладога Фронту былі сканфіскаваныя 4 сыстэмных блёка, а таксама рознага кшталту інфармацыйныя носьбіты. Акрамя гэтага 23 сьнежня 2006 году падчас перасячэньня польска-беларускай мяжы ў прэсавага сакратара Маладога Фронту Барыса Гарэцкага памежнікамі быў сканфіскаваны прыватны ноўтбук, які да гэтага часу ня вернуты.
Па зьвестках прэс-службы МФ, да гэтага часу сьледчыя не прадаставілі аніякіх дакумантаў аб тым, што ўзгаданая тэхніка праходзіць якую-кольвек экспэртызу, таму маладафронтаўцы, настойваючы на захаваньні законнасьці, патрабуюць вяртаньня тэхнікі.
