На Алеся Кіркевіча заведзена адміністратыўная справа

22 лістапада ў Ленінскім РАУСе Гародні грамадскі актывіст Алесь Кіркевіч быў апытаны на прадмет яго ўдзелу ў традыцыйным Дні памяці паўстанцаў 1863 году, які 27 кастрычніка прайшоў у Свіслацкім раёне.

Кіркевічу паведамілі, што ў дачыненні да яго ідзе адміністратыўны працэс і задалі некаторыя пытанні, якія былі аформлены ў выглядзе пратаколу апытання. Алесь Кіркевіч па сутнасці справы адказаў, што ён сапраўды быў у Свіслачы на гэтым мерапрыемстве, і адмовіўся адказваць на шэраг іншых пытанняў. Пратаколу пра адміністратыўнае правапарушэнне яму не давалі.

Бліжэйшым часам стане вядома, будзе гэта адміністратыўная справа скіравана ў Свіслацкі раённы суд ці органы міліцыі самі вынесуць пастанову.