Салігорск: Рок-салідарнасць з забароненымі музыкамі
Увечары 27 чэрвеня ў Салігорску ў межах кампаніі “Рок-салідарнасць” адбылася творчая сустрэча з Пітам Паўлавым і Алегам Дземідовічам, музыкамі вядомага нон-канфармісцкага гурта N.R.M. Ініцыятары сустрэчы адзначаюць, што мэта кампаніі -- падбадзёрыць забароненых беларускіх рок-музыкаў і засароміць чыноўнікаў, якія ва ўпор не бачаць імі жа створаных “чорных спісаў” дзеячаў культуры.
Сустрэча адбывалася на прыватнай сядзібе, куды ўдзельнікаў цэнтралізавана даўстаўлялі ад салігорскага фізкультурна-аздараўленчага комплексу. Як адзначаюць мясцовыя праваабаронцы, каля ФАКу ўвесь гэты час дзяжурылі дзьве патрульныя машыны міліцыі. Зрэшты, на самой сустрэчы прадстаўнікоў сілавых стурктураў заўважана не было, і выступ музыкаў адбыўся ў прыязнай абстаноўцы без эксцэсаў.
Самі “энэрэмаўцы” пад час выступу сказалі, што палітыкай ніколі не займаліся і не займаюцца, але маюць уласную нязменную напрацягу многіх год грамадзянскую пазіцыю.
