Святлана Вяргейчык настойвае на пераглядзе сваёй скаргі ў Следчым камітэце

Збітая падчас маўклівай акцыі пратэсту летам 2011 года пенсіянерка не задаволена, што скаргу на дзеянне міліцыянта ўзгаднілі з ім самім жа. За той час, што спадарыня Святлана змагаецца за свае правы, міліцыянт Пазняк пайшоў на павышэнне і цяпер займае кіраўнічую пасаду ў Следчым камітэце.

Нагадаем, што Святлана Вяргейчык дамагаецца пакарання для супрацоўнікаў Кастрычніцкага УУСМінска  і ў прыватнасці тагачаснага начальніка Пазняка А.В., якія падчас затрымання яе на плошчы каля ДК Чыгуначнікаў 6 ліпеня 2011 году нанеслі ёй пабоі. Жанчына мае заключэнне з 9-ай гарадской клінічнай бальніцы, куды яна была дастаўлена брыгадай хуткай дапамогі з УУС адміністрацыі Кастрычніцкага раёна.

Пракуратура Кастрычніцкага раёна сталіцы не знайшла падставаў для прыцягнення міліцыянтаў да крымінальнай адказнасці, хоць і прызнала   факт парушэння імі патрабаванняў ПВКаАП Рэспублікі Беларусь і Закону “Аб органах унутраных спраў Рэспублікі Беларусь”.  У выніку з супрацоўнікамі міліцыі грамадскай бяспекі УУС Кастрычніцкага раёна будуць праведзеныя дадатковыя заняткі аб парадку і ўмовах прымянення фізічнай сілы, прыёмаў барацьбы, падручных сродкаў, для прадухілення адміністрацыйных правапарушэнняў і вядзення адміністрацыйнага працэса.

Пенсіянерка з такім рашэннем пракуратуры не пагадзілася, таму склала скаргу  ў Следчы камітэт з просьбай правесці дадатковую праверку.  Там узбуджаць крымінальную справу таксама адмовіліся. Рашэнне прымаў старэйшы следчы Кастрычніцкага раёна Пудаў Н.Н. Адметна, што сваё рашэнне ён ўзгадняў з непасрэдным начальнікам - Пазняком А.В. – тым самым былым міліцыянтам, які збіваў пенсіянерку і якога яна патрабуе прыцягнуць да крымінальнай адказнасці.

Паводле ч.2 арт.140 КПК Рэспублікі Беларусь забараняецца даручаць разгляд скаргі службовай асобе, дзеянні якой абскарджваюцца, альбо асобе, якая зацвердзіла абскарджваемае рашэнне.

У сувязі з гэтым спадарыня Святлана падрыхтавала скаргу ў пракуратуру г. Мінска з просьбай адмяніць пастанову следчага Пудава аб адмове ва ўзбуджэнні крымінальнай справы. А таксама паўторна накіраваць матэрыялы праверкі ва ўпраўленне Следчага камітэта РБ па г. Мінску.