Алесь Бяляцкі спрабуе адаптавацца на новым месцы

Пра гэта правабаронца паведаміў у паштоўцы, дасланай з Бабруйскай выпраўленчай калоніі №2 бялыніцкаму журналісту Барысу Вырвічу.

“Я атрымаў паштоўку 4 красавіка, - распавядае Барыс Вырвіч. -  Алесь выказвае падзяку за падтрымку і віншаванні, а таксама паведамляе: “У мяне збольшага ўсё нармальна, зараз спрабую адаптавацца на новым месцы. Добра, што вы адрадзілі сваю газету. Трымайцеся, да сустрэчы”. Гэта першая паштоўка ад Алеся, якую я атрымаў пасля яго пераводу з карантына Бабруйскай калоніі ў атрад № 14. Пра тое, чым ён зараз займаецца ў атрадзе, Алесь не піша”.

Алеся Бяляцкага перавялі з карантына Бабруйскай выпраўленчай калоніі № 2 у атрад 22 сакавіка, пра гэта ён паведаміў у лісце да сваёй жонкі Наталлі Пінчук.