Падвышэнне камунальных коштаў для вязняў – мяжа выжывання
Павел Севярынец. Архіўнае фота.
Вязняў Куплінскай камендатуры на Пружаншчыне папярэдзілі, што за студзень яны павінны будуць заплаціць камунальныя памерам 340 тысяч рублёў, у той час як у снежні кошт пражывання быў 160, а ў лістападзе – 40 тысяч рублёў.
Гэта плата за месца ў пакойчыку 12 метраў на траіх, за халодную іржавую ваду, за сумніўнае цяпло і адсутнасць гарачай вады. Агульная плата за адзін пакой – больш мільёна рублёў.
Шмат хто з вязняў, хто працуе ў калгасах, атрымліваюць 500-700 тысячаў. Акрамя платы за пражыванне, ім трэба плаціць аліменты ці нейкія іншыя спагнанні. На ежу грошай не застаецца. Многія апынуліся на мяжы выжывання.
- Гэтыя вязні ў адчаі, - кажа Павел Севярынец (на фота), - галадаць або красці? Людзі пастаўлены вось на такую мяжу.
На думку Севярынца, беларуская праваахоўная сістэма засталася з сталінскіх часоў карнай.
- Ні выпраўлення, ні заахвочвання да чалавечага жыцця ў спецкамендатуры па вялікаму рахунку не адбываецца. Людзі церпяць і думаюць: хутчэй бы гэта скончылася, каб выскачыць адсюль і жыць так, як людзі. Няма таго ладу жыцця, на які можна вязням арыентавацца, - кажа Павел.
Фота з сайту baj.by
