Гародня: завочныя суды і немагчымасць абскарджання
Праўдападобна, што гарадзенскія суды трывала ўзялі на ўзбраенне новую тактыку – завочна выносіць пастановы па адміністрацыйных справах, а потым цягнуць з высыланнем копій пастановаў, каб прыцягнутыя да адказнасці асобы не мелі нават тэарэтычнай мажлівасці іх абскардзіць. У гэтым пераканаліся прадстаўнікі “Маладога Фронту” Алесь Кіркевіч і Вераніка Велігор.
Алесь Кіркевіч атрымаў праз пошту копію пастановы суду, які адбыўся 27 кастрычніка. Яна, як сведчыць штамп, была выслана ажно праз 2 тыдні – 11 лістапада. Выявілася, што суддзя Віталь Ляцко завочна засудзіў Кіркевіча да 45 базавых велічынь штрафу (1 575 000 рублёў), а Велігор да 25 базавых велічынь (875 000 рублёў). Пры тым у пастанове чамусьці сказана, што Кіркевіч і Велігор двойчы выклікаліся ў суд, але не з’яўляліся, а таксама “подвергались принудительному приводу в суд. Из рапортов милиции явствует, что осуществить привод не представилось возможным”. Насамрэч ніхто не выклікаў актывістаў у суд, а прыведзеная цытата з пастановы проста абсурдная.
Нагадаем, што Алесь Кіркевіч і Вераніка Велігор былі затрыманыя ў ноч на 17 верасня у час распаўсюду інфармацыйных матэрыялаў да грамадзянскай акцыі 21 верасня.
