За здымкі на Аршанскім кірмашы затрымалі журналістаў
Журналістка «Новага часу» Лола Бурыева і журналіст «Нашай Нівы» Сяргей Сацюк былі затрыманыя за відэаздымкі на кірмашы ў Воршы. Іх прымусілі даць тлумачэньні, што і зь якой мэтай яны здымаюць, распавёў сябар БАЖ, праваабаронца грамадзянскай кампаніі «Наш дом» Мікалай Петрушэнка.
Журналістаў некалькі гадзін трымалі ў адміністрацыі кірмашу,
запатрабаваўшы дакумэнтальна пацьверджаных фактаў рэдакцыйнага заданьня,
кажа спадар Петрушэнка:
«Журналісты здымалі сюжэт пра сёньняшні эканамічны стан беларускага
грамадзтва. Да іх падышоў міліцыянт і папрасіў прад’явіць пасьведчаньні.
Журналісты пагадзіліся, але неўзабаве зьявілася дырэктарка кірмашу
ў суправаджэньні таго самага міліцыянта, і ўсім было загадана зайсьці
ў будынак адміністрацыі. Затрыманым не патлумачылі іхныя правы, але
загадалі даваць тлумачэньні, адкуль прыехалі і чым займаюцца ў Воршы».
Мікалай Петрушэнка абураны тым, што журналістам перашкодзілі выконваць
прафэсійныя абавязкі. На ягоную думку, адміністрацыя кірмашу баялася,
што на відэа будуць адлюстраваныя хібы працы гэтай гандлёвай установы,
і што такая праблемная тэма, як эканамічнае становішча ў Беларусі, будзе
раскрытая праз нейкія сумныя рэаліі мясцовага жыцьця.
