Акцыя “Свабоду Алесю Бяляцкаму!” - у Бярозе

Бярозаўскія праваабаронцы 11 верасня правялі акцыю ў падтрымку арыштаванага кіраўніка праваабарончага цэнтра “Вясна”Алеся Бяляцкага. Улёткі з заклікам “Свабоду Алесю Бяляцкаму!” раздаваліся ў найбольш шматлюдным месцы - на вялікім гарадскім рынку.

Адзін з удзельнікаў акцыі Сяржук Русецкі лічыць, што тыя, хто атрымаў улёткі, цяпер будуць ведаць праўду пра Алеся Бяляцкага.

Па словах праваабаронцаў, калі пра палітвязняў па справе 19 снежня людзі больш-менш ведаюць, то пра Бяляцкага - амаль нічога. Цяжка сказаць, ці можа гэта акцыя неяк істотна паўплываць на меру стрымання, абраную для кіраўніка “Вясны”. Калі пасля заявы інфармацыйнага агенцтва “Рэйтэр” з'явіўся спадзеў наконт вызвалення Бяляцкага разам з іншымі палітзняволенымі, аднак зараз гэта пад вялікім пытаннем. Уладам, напэўна, выгадна  выкарыстоўваць гэта як нагоду для дыскрэдытацыі  праваабаронцаў і астатніх прадстаўнікоў апазіцыі. Каб за стол перамоваў сесці з тымі, хто будзе казаць што трэба - з прадстаўнікамі палітычных партый, якія не з'яўляюцца апазіцыйнымі да ўлады, ды праўладных праграмадскіх аб'яднанняў.

Акцыя, па ацэнках праваабаронцаў прайшла спакойна. Ад улёткі адмовіўся толькі адзін чалавек.