“Супраўцы” вярнулі кампутары “вясноўцам”, аднак іх перададуць у дзіцячы дом
Праваабаронцам з ПЦ “Вясна” нарэшце вярнулі сканфіскаваныя пад час ператрусу 19 сьнежня 2010 года кампутарную тэхніку, носьбіты памяці, дыскі і касэты. Тэхніка вернутая 8 верасьня ў поўным аб’ёме, яе тэхнічным станам зараз зоймуцца адмыслоўцы.
Аднак у праваабаронцаў з гэтай нагоды радасьці мала, паколькі існуе вялікая верагоднасьць, што сістэмнымі блокамі і ноўтбукамі, якія знаходзіліся 9 месяцаў у руках экспертаў СУПР ГУУС Менгарвыканкама, карыстацца ў праваабарончых мэтах небяспечна. І таму яна будзе перададзеная ў адзін з дзіцячых дамоў Беларусі.
Кампутары па вопісу перадаў следчы СУПРа ГУУС Менгарвыканкама Д. Дышчанка.
Між тым яшчэ некалькі ноўбукаў, сканфіскаваных пад час другога ператрусу на “Вясне” 17 студзеня, дагэтуль знаходзяцца ў следчым упраўленьні КДБ.
