Пікет у Берасьці забаранілі
Берасьцейскі гарвыканкам адмовіў мясцовым праваабаронцам у правядзеньні пікету за вызваленьне Алеся Бяляцкага. Грамадзкая акцыі плянавалася на 22 жніўня на стадыёне "Лякаматыў" — адзіным у абласным цэнтры месцы, якое мясцовая ўлада вызначыла для грамадзкіх публічных мерапрыемстваў.
Падставаю для забароны пікету стала тое, што нібыта ў гэты ж дзень, у заяўлены час, на стадыёне будзе адбывацца футбольны матч.
Берасьцейскі праваабаронца Ўладзімер Вялічкін кажа:
"Нас зьдзівіла такая падстава для адмовы. Мы маглі б і не перашкаджаць
таму матчу, калі ён там будзе. Маглі б стаць на ўваходзе каля брамы. Але
нас адмова не зьдзівіла, бо мы ведаем, што ўлады нічога лепшага
прыдумаць ня могуць. Гэта абражае не праваабаронцаў, а простых
грамадзянаў, зь якімі ўлады ня лічацца".
Такім чынам, пакуль на Берасьцейшчыне не задаволеная ніводная заяўка на
правядзеньне пікету салідарнасьці з арыштаваным кіраўніком
праваабарончага цэнтру "Вясна" Алесем Бяляцкім. Раней адмову атрымалі
праваабаронцы Баранавічаў.
