Пракуратура разбіраецца са скаргай журналістаў «Еўрарадыё»
Трое журналістаў «Еўрарадыё» пабывалі ў Генпракуратры з нагоды скаргаў на незаконныя затрыманні ў часе вулічных акцый.
У чэрвені і ліпені ў часе акцый «маўклівага пратэсту» ад сілавікоў у цывільным пацярпелі трое супрацоўнікаў акрэдытаванага ў Беларусі «Еўрапейскага радыё для Беларусі» — Наста Манцэвіч, Андрэй Елісееў і Павел Свярдлоў (апошні трапляў пад затрыманні двойчы).
Карэспандэнты «Еўрарадыё» паскардзіліся ў Генеральную пракуратуру, Міністэрства ўнутраных спраў і Міністэрства замежных спраў, якое выдавала дазвол на адкрыццё ў Беларусі карпункту радыёстанцыі.
Выклікі ў пракуратуру пачаліся ў канцы ліпеня — прыкладна праз тыдзень пасля падачы скаргаў.
Як распавёў БАЖ галоўны рэдактар «Еўрарадыё» Віталь Зыблюк, журналістаў выклікалі па чарзе да розных следчых і прасілі падрабязна распавесці пра дзеянні невядомых нападнікаў. Адзін з карэспандэнтаў сутыкнуўся ў пракуратуры з прэс-сакратаром ГУУС Мінгарвыканкама Аляксандрам Ластоўскім, які выходзіў з кабінета следчага — як мяркуюць журналісты, таксама пасля гутаркі на гэтую ж тэму.
«Супрацоўнікі пракуратуры трымаліся з нашымі карэспандэнтамі нейтральна, і таму зразумець іх стаўленне да гэтых падзеяў было немагчыма. Але выглядала на тое, што асобы нападнікаў у цывільным невядомыя не толькі журналістам, але і пракуратуры. Прынамсі, яны так кажуць», — дадаў В. Зыблюк.
Між тым, фота- і відэаматэрыялы, якія журналісты прапаноўвалі далучыць да «справы», следчыя з нейкіх прычын прымаць не захацелі.
«Невядома, чым гэтая праверка скончыцца. Але ёсць законы, і мы хочам скарыстаць сваё права змагацца за іх выкананне», — падкрэсліў кіраўнік карпункту.
Нагадаем, што 13 ліпеня група з 30-і журналістаў розных СМІ таксама перадала ў Генпракуратуру «калектыўны зварот» з нагоды затрыманняў і брутальнага абыходжання з боку сілавікоў. Аналагічны зварот накіравалі міністру ўнутраных спраў, а копіі — міністру інфармацыі і старшыні Вярхоўнага суда. Падпісанты разлічваюць на пісьмовы адказ кожнаму з іх цягам 30-і дзён — у адпаведнасці з законам РБ «Аб зваротах грамадзян».
