Грамадзянка Расіі абскарджвае ў Менгарсудзе пастанову пра штраф за нецэнзурную лаянку

Марына Дукмасава, якая з'яўляецца грамадзянкай Расійскай Федэрацыі, 7 ліпеня ў выніку разгляду адміністратыўнай справы судом Партызанскага раёна Менска была аштрафаваная на 10 базавых велічыняў за «дробнае хуліганства». 6 ліпеня жанчына разам з непаўналетнім сынам, які таксама з'яўляецца расійскім грамадзянінам, была затрыманая і дастаўленая ў Маскоўскае РУУС. Супрацоўнікі міліцыі абвінавацілі яе ў нецэнзурнай лаянцы ў грамадскім месцы.

У адпаведнасці з вынесенай пастановай суда, Марына Дукмасава была прызнаная вінаватай у здзяйсненні дробнага хуліганства - нецэнзурнай лаянцы ў грамадскім месцы, у раёне дома № 104 па праспекце Дзяржынскага. Па гэтым адрасе размешчаны Гандлёвы цэнтр "Тытан", каля якога па серадах збіраюцца «маўклівыя рэвалюцыянеры».
З вынесенай судовай пастановай М. Дукмасава нязгодная і лічыць яе незаконнай, а таму абскарджвае ў гарадскім судзе.

У скарзе жанчына заяўляе, што інкрымінаваных ёй дзеянняў не здзяйсняла і віну не прызнала. У тлумачэнні суду Марына паказала, што 6 ліпеня каля 20:00 разам са сваім непаўналетнім сынам Рыгорам Перэльманам знаходзілася каля крамы «Сандрык», дзе была беспадстаўна затрыманая работнікамі міліцыі. Далей яна адзначае, што ў аснову судовай пастановы былі пакладзены пісьмовыя паказанні супрацоўніка міліцыі Чарняўскага В.А., які сведчыць, што затрыманая нецэнзурна лаялася. Аднак у пратаколе аб адміністратыўным правапарушэнні сведка Чарняўскі В.А. не значыцца. "Лічу, што пісьмовыя паказанні сведкі Чарняўскага В.А. не былі аформленыя належным чынам, у адпаведнасці з патрабаваннямі ПВКаАП Рэспублікі Беларусь і не могуць з'яўляцца дапушчальнымі доказамі па гэтай справе», - гаворыцца ў скарзе.

Таксама М. Дукмасава лічыць, што суд Партызанскага раёна Менска не распачаў неабходных мер для поўнага і аб'ектыўнага разгляду дадзенай справы: «не запатрабавалі з ГУУС Менгарвыканкама відэаматэрыялы аператыўнай здымкі, якая выраблялася супрацоўнікамі міліцыі 06.07.2011 г. у раёне пр. Дзяржынскага, 104 у г. Менску ў перыяд часу з 19:00 да 20:00 гадзін. У адпаведнасці з ч. 2 арт. 06.11 ПВКаАП Рэспублікі Беларусь, фота- і відэазапісы таксама з'яўляюцца доказам па справе. Суд не прыняў да выкліку ў судовае паседжанне сведкі Чарняўскага В.А., а таксама майго сына Перэльмана Рыгора Алегавіча».

Паколькі суд не спрабаваў устанавіць ісціну па справе і вынес неабгрунтаваную пастанову аб прыцягненні да адміністратыўнай адказнасці, М. Дукмасава просіць гарадскі суд адмяніць гэтую пастанову і спыніць вытворчасць па справе ў сувязі з адсутнасцю падзеі і складу правапарушэння.