Рагачоўскаму апазіцыянеру абяцаюць зменшыць штрафы, калі ён кіне займацца палітыкай
Актывіст аргкамітэта па стварэнні партыі “Беларуская хрысціянская дэмакратыя”, жыхар Рагачова Дзяніс Дашкевіч упершыню ў гісторыі райцэнтра намераны арганізаваць тут сацыяльна-палітычную акцыю. Па ягонай задуме, некалькі дзесяткаў людзей падыдуць да райвыканкама, трымаючы ў руках лісты паперы, на якіх будзе напісана: «Дзе 500 даляраў?» Нагадаем, менавіта такім, згодна абяцанняў прэзідэнта, павінен быць сярэдні заробак беларусаў.
«Акцыю запланавалі на 3 ліпеня, гэта як раз выходны дзень. У нас яшчэ месяц наперадзе, але ўжо будзем распаўсюджваць улёткі з інфармацыяй. Бо ў Рагачове дагэтуль нічога такога кшталту не ладзілі, нашы людзі вельмі марудна расчухваюцца, - кажа Дзяніс Дашкевіч. - Мы вырашылі пачаць праводзіць акцыі, якія пераследуюць не палітычныя, а чыста сацыяльныя мэты. І ўбачылі, як мясцовыя ўлады адразу занерваваліся і заварушыліся. Такога не было, калі праводзілі традыцыйны «Ланцуг неабыякавых людзей», тады ўлады былі спакойнымі. А зараз спужаліся”.
На днях актывісту вярнулі аргтэхніку, канфіскаваную КДБ падчас ператрусу пасля прэзідэнцкіх выбараў. Па словах Дзяніса, супрацоўнік Камітэта дзяржбяспекі, які вяртаў кампутар, правёў з хлопцам размову. І папрасіў не займацца палітыкай да 1 ліпеня. Чаму абазначана менавіта гэтая дата, супрацоўнік не патлумачыў.
Маладзён мае свой бізнес і сцвярджае, што больш часта ім пачалі цікавіцца супрацоўнікі падатковай інспекцыі і фінансавай міліцыі. Нядаўна выпісалі некалькі штрафаў.
«Парушэнні сапраўды былі, я вінаваты. Але цікава, што мяне папярэдзілі: маўляў, калі кінеш займацца палітыкай, штрафы зменшым», - распавёў актывіст.
“Праваабарончая хроніка”
