Будаўніцтва касцёла падганяецца пад “Дажынкі”

У Маладэчне ідзе будаўніцтва новага касцёла. На пашпарце будаўніцтва пазначана, што аб’ект павінны быць завершаны ў 2012 годзе. Але, як паведамілі каталіцкія вернікі, мясцовыя ўлады настойваюць на паскарэнні тэмпаў будаўніцтва. Звязана гэта з тым, што сёлета Маладэчна будзе сустракаць “Дажынкі”: недабудаваны аб’ект, напэўна, сапсуе святочны настрой.

Касцёл святога Казіміра будуецца на грошы беларускіх і замежных вернікаў. Прыхажанам вядома, з якой цяжкасцю ідзе будаўніцтва, здабываюцца на гэта сродкі. Пачатак будаўніцтва тармазіўся з-за перашкодаў з боку мясцовых уладаў, а зараз – наадварот – трэба хутчэй дабудоўваць, бо размяшчаецца касцёл у цэнтральным месцы, насупраць будучага “Лядовага палаца” – на шляху “Дажынак”.

Ірына Б., прыхажанка касцёла, юрыст, адзначае: “Зразумела, што па законе ніхто не зможа прад’явіць да касцёлу ніякіх прэтэнзій, але вядома, што нашы ўлады могуць ўздзейнічаць разнастайнымі неафіцыйнымі спосабамі. Таму ўсе на гэты конт перажываюць”.

“Праваабарончая хроніка”