За “Сыходзь!” – штрафы па 10 базавых

16 сакавіка адміністрацыйная камісія адміністрацыі Ленінскага раёну горада Гродна прыняла рашэнне аштрафаваць моладзевых актывістак Вольгу Багдановіч і Кацярыну Герасімчык. Абедзве атрымалі позвы на паседжанне камісіі і збіраліся туды ісці, аднак, за паўтары гадзіны да прызначанага часу да іх у інтэрнат прыехаў супрацоўнік міліцыі і прымусіў сесці ў машыну. Пры тым прадстаўнік міліцыі катэгарычна адмовіўся прадстаўляцца, паводзіў сябе дастаткова агрэсіўна, ездзіў па сваіх асабістых справах. Пазней высветлілася, што яго прозвішча Андрэй Шкляр.

Нагадаем, што Вольга Багдановіч і Кацярына Герасімчык былі затрыманыя ў ноч з 11 на 12 лютага, на іх былі складзены некалькі пратаколаў пра адміністрацыйныя правапарушэнні. Адміністрацыйная камісія за расклейванне налепак “Сыходзь!”, “Малады Фронт”, а таксама з тэкстам пра свабоду палітвязням, аштрафавала кожную з моладзевых актывістак на 10 базавых грашовых велічынь.

18 сакавіка ў Ленінскім судзе г. Гродна адбудзецца разгляд адміністрацыйнай справы Кацярыны Герасімчык паводле іншага пратаколу, складзенага нібыта за хуліганства.   

“Праваабарончая хроніка”