Брэст: Актывістку каманды Саннікава раніцай 20 снежня выклікаюць у міліцыю
Кіраўніку Брэсцкай гарадской арганізацыі незалежнага прафсаюзу радыёэлектроннай прамысловасці Аляксандры Худасоўцавай на мабільны тэлефон патэлефанавала жанчына, якая назвалася Маргарытай і прадставілася супрацоўніцай Маскоўскага РАУС г.Брэста. Яна запрасіла актывістку выбарчай кампаніі аднаго з альтэрнатыўных кандыдатаў у прэзідэнты прыйсці ў РАУС «на размову» раніцай 20 снежня.
Аляксандра Худасоўцава ў адказ заявіла, што з’явіцца ў міліцыю, толькі атрымаўшы павестку. На яе думку, сам характар гэтай тэлефоннай размовы сведчыў, што праваахоўныя органы спрабуюць узяць на спалох прыхільнікаў альтэрнатыўных кандыдатаў у дзень выбараў і перашкодзіць планам некаторых з іх прыбыць вечарам 19 снежня ў Мінск.
А вось затрыманы нядзельным днём у Брэсце Віктар Чайкоўскі, які з'яўляецца даверанай асобай Мікалая Статкевіча, у беларускую сталіцу дакладна не патрапіць. Пасля затрымання яго даставілі ў Ленінскі РАУС г.Брэста, дзе абвінавацілі ў «дробным хуліганстве». Знаходзіцца пад арыштам Чайкоўскі будзе да суда, які пройдзе не раней за панядзелак.
«Праваабаронцы за свабодныя выбары»
