Светлагорск: Камісія нарэшце прыняла заяву аб назіральніку

У Светлагорскай акруговай выбарчай камісіі 11 жніўня прынята заява грамадзян аб накіраванні туды ў якасці назіральніка прадстаўніка дэмакратычных сіл Вадзіма Болбаса. Нагадаем, што на мінулым тыдні намеснік старшыні камісіі Уладзімір Кукар не прыняў заяву з-за адной выпраўленай лічбы.

Вадзім Болбас, сябра Партыі БНФ, быў накіраваны назіральнікам у акруговую камісію  Светлагорскай выбарчай акругі ад групы жыхароў Светлагорска ў колькасці 33 чалавек. Першы раз В. Болбас з’явіўся ў камісію 7 жніўня. Але намеснік старшыні камісіі Ул. Кукар (загадчык арганізацыйна-кадравага аддзелу Светлагорскага райвыканкама) не прыняў у яго заяву грамадзян з той прычыны, што ў заяве ў нумары акруговай камісіі была выпраўлена адна лічба.

Каментуючы дзеянні чыноўніка В. Болбас адзначыў, што, на яго погляд, сапраўднай прычынай адмовы была не выпраўленая лічба, а тое, што для кіраўніцтва камісіі непажаданая прысутнасць незалежнага назіральніка. 11 жніўня В. Болбас прадставіў у камісію новую заяву, таксама ад групы з 33-х грамадзян, і пачаў назіранне. 

“Праваабаронцы за свабодныя выбары”