Дзярждэпартамент ЗША адзначае пагаршэньне сітуацыі ў Беларусі з правамі чалавека
Штогод Дзяржаўны дэпартамэнт ЗША адзначае пагаршэньне сытуацыі ў Беларусі. Летась гэта было зьвязана таксама з рэфэрэндумам пра мажлівасьць трэцяга прэзыдэнцкага тэрміну Аляксандра Лукашэнкі й выбарамі ў Нацыянальны сход.
“Улады пасьлядоўна адмаўляюць грамадзянам у праве зьмяніць урад”, – канстатуецца ў справаздачы. Як і раней, у дакумэнце згадваецца пра нерасьледаванае зьнікненьне вядомых апазыцыйных дзеячаў. Працягваюцца злоўжываньні міліцыі, катаваньні вязьняў і неабгрунтаваныя затрыманьні, “дзедаўшчына” ў арміі ды перанасяленьне турмаў.
У разьдзеле справаздачы дзярждэпартамэнту, які прысьвечаны нечалавечнаму абыходжаньню і пакараньню, традыцыйна адзначаецца, што Канстытуцыя Беларусі забараняе такую практыку. Аднак міліцыя і турэмныя ахоўнікі пастаянна зьбіваюць затрыманых і вязьняў.
Канкрэтным прыкладам падаецца факт сьмерці 23 студзеня летась Максіма Храмылёва ў міліцэйскім ізалятары. Паводле варты даверу сьведчаньняў, на ягоным целе былі знойдзеныя сьляды гвалту.
У 2004 годзе таксама засталася вялікай колькасьць палітычна матываваных, затрыманьняў грамадзян сіламі бясьпекі на кароткі час. Сілы бясьпекі зноў парушалі права на прыватнае жыцьцё і свабоду згуртаваньняў, уважліва кантралявалі дзейнасьць апазыцыйных палітыкаў, праваабарончых арганізацыяў.
Амэрыканскі дзярждэпартамэнт зноў канстатаваў, што ўлады Беларусі далей абмяжоўвалі свабоду слова і друку ды не прызнавалі права на аб’яднаньні і сходы.
Новым рэкордам стала тое, што міністар інфармацыі прыпыняла выданьне 25 газэтаў, у тым ліку 11 у месяц парлямэнцкіх выбараў.
Летась зь Беларусі быў дэпартаваны незалежны журналіст з украінскім грамадзянствам Міхаіл Падаляк, была забітая незалежная журналістка Вераніка Чаркасава, быў арыштаваны расейскі журналіст Павал Шарамет, некалькі разоў міліцыя затрымлівала здымачную групу маскоўскага тэлеканалу РЭН-ТВ.
19 кастрычніка летась быў зьбіты апэратар гэтага тэлеканалу, а таксама яго калега зь іншага расейскай тэлекампаніі НТВ. У справаздачы згадваецца, што ў той жа дзень быў жорстка зьбіты лідэр АГП Анатоль Лябедзька.
Што да несанкцыянаваных сходаў, дык справаздача ўпершыню адзначае перасьлед такога сходу на прыватнай кватэры – гэта здарылася 2 кастрычніка зь Сяргеем Антончыкам.
У разьдзеле аб незабесьпячэньні справядлівага суду зьявіліся новыя факты, зь якіх аўтары справаздачы выдзяляюць працэсы над прадпрымальнікам-гарадзенцам Валерам Леванеўскім і былым амбасадарам у Латвіі Міхаілам Марынічам.
Зноў адзначаюцца перавагі, якімі карыстаецца ў Беларусі праваслаўная царква, што мае з урадам канкардат, у той час як пратэстанты, юдаісты ды іншыя зьведваюць ціск улад. Справа здача адзначае, што ў краме “Праваслаўная кніга” па-ранейшаму прадаюць антысэміцкую літаратуру.
У дакумэнце згадваюцца таксама справы былога старшыні Нацыянальнай тэлерадыёкампаніі Ягора Рыбакова ды экс-кіраўніцы справамі прэзыдэнта Галіны Жураўковай як прыклады карупцыі на найвышэйшым узроўні. Гэта ня ёсьць сур’ёзнымі спробамі змагацца з карупцыяй, робіць выснову Дзярждэпартамэнт ЗША. (Паводле Радыё Свабода)
