Намесьнік старшыні Партыі БНФ Віктар Івашкевіч далучыўся да галадоўкі

Сёньня, 8 чэрвеня, а 10.00 да галадоўкі, якую абвесьцілі дэпутаты парлямэнцкай групы “Рэспубліка”, далучыўся намесьнік старшыні Партыі БНФ Віктар Івашкевіч, паведаміла прэс-служба партыі. Нагадаем, што мэта галадоўкі абвешчанай дэпутатамі - дасягнуць унясеньня зьменаў у выбарчае заканадаўства і патрабаваньне вызваліць Міхаіла Марыніча. Валеры Фралоў, Уладзімер Парфяновіч, Сяргей Скрабец галадуюць ужо шосты дзень. Да іх далучыліся сябры Аб’яднанай грамадзянскай партыі Марына Багдановіч, Генадзь Ананьеў, Уладзімер Чырвоненка, Юры Істомін. “Я заклікаю усіх сябраў Партыі БНФ, актывістаў, грамадзян, якім неабыякавы лёс краіны прыходзіць кожны дзень а 18.00 да дому на Казарменым завулку і падтрымаць галадоўшчыкаў,” – кажа Віктар Івашкевіч.