Хроніка палітычнага пераследу беларусаў 16-17 студзеня Дапоўнена
У Беларусі з пачаткам новага года працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 16-17 студзеня 2024 году збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
У Гомелі за "экстрэмізм" асудзілі дырэктара лялечнага тэатру Дзмітрыя Гарэліка
- Дырэктар Гомельскага лялечнага тэатру Дзмітрый Гарэлік
Адміністрацыйную справу Дзмітрыя Гарэліка паводле ч.2 арт.19.11 (распаўсюд экстрэмісцкіх матэрыялаў) разглядала ў судзе Чыгуначнага раёна Гомеля суддзя Сакалова Ганна.
Праваабаронцам пакуль не вядома, што стала падставай для абвінавачанняў і які вырак вынесла Сакалова. Але з сайту Гомельскага лялечнага тэатру прозвішча Гарэліка пакуль не знікла — ён усё яшчэ пазначаны як дырэктар.
Варта адзначыць, што мужчына кіруе тэатрам з 1 чэрвеня 1992 года. У 2023 годзе тэатр адзначыў сваё 60-годдзе, напісала "Гомельская Вясна".
Тэлеграм-канал беларускага мастака-акцыяніста Уладзіслава Бохана прызнаны "экстрэмісцкім"
- Уладзіслаў Бохан. Фота: Наша Ніва
Адпаведнае рашэнне прынятае судом Баранавіцкага раёна і горада Баранавічы 12 студзеня.
Былы настаўнік гісторыі з Беларусі Уладзіслаў Бохан, вядомы сваімі пранкерскімі акцыямі ў беларускіх і расійскіх школах.
Таксама Спіс экстрэмісцкіх матэрыялаў папоўнілі:
- Telegram-каналы і чаты "Солигорская игра", "Нация лидеров", "Беларускі фонд спартыўнай салідарнасці/BSSF", "Беларусы ў ЗША", "ШОС";
- Instagram старонкі "belarus tv", "karina.jр";
- Старонкі ва "Укантакце" "Partizan | orchestra", "Першы Рэгiён", "Вячеслав Шевяко";
- Facebook старонка "BG.Media";
- Старонка ў "Аднакласніках" "ЕЛЕНА БОРСУК";
- TikTok-старонкі "nil_la", "POLINA_DOZOR", "Belarus", "BelarusyWarszawa", "Жыве Беларусь!".
Сілавікі затрымалі жыхара Баранавічаў з-за каментароў у чатах — раней яго судзілі за паведамленне пад пастом
- Віталь Коршун
Праўладныя тэлеграм-каналы 16 студзеня паведамілі пра затрыманне Віталя Коршуна. На "пакаяльным" відэа мужчына кажа, што "заклікаў учыняць гвалт над супрацоўнікамі АМАПа, проста на эмоцыях". Перад камерай ён стаіць у кайданках, напісала "Медыязона"
У верасні 2021 года суд ужо адпраўляў Віталя пад арышт на два месяцы з-за паведамлення пад пастом пра вайскоўца.
У Мінску 18 студзеня пачнуць судзіць вядомага мінскага фатографа
Анонс судовага пасяджэння ў дачыненні да Аляксандра Васюковіча праваабаронцы "Вясны" заўважылі ў раскладзе судоў.
Яго справу ў судзе Фрунзенскага раёну Мінска будзе разглядаць суддзя Юлія Крэпская. Аляксандру інкрымінаваны "народны" арт. 342 (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх) Крымінальнага кодэкса.
Аляксандр — вядомы беларускі фатограф-фрылансер. За прафесійную кар'еру ён атрымаў безліч узнагарод за свае працы.
Паводле папярэдняй інфармацыі, Васюковіч знаходзіцца ў СІЗА-1.
Падтрымайце Аляксандра: СІЗА №1,220030, Мінск, Валадарскага, 2, Аляксандр Алегавіч Васюковіч
Палітзняволенага Рыгора Кастусёва перавялі на турэмны рэжым
- Рыгор Кастусёў
Пра гэта ў Facebook напісаў 16 студзеня зяць старшыні партыі БНФ Дзмітрый Антончык.
"Пасяджэнне праходзіла па відэасувязі. Куды і калі пераводзяць пакуль не вядома", — напісаў ён.
Па інфармацыі праваабаронцаў, адпаведнае рашэнне ў судзе Івацэвіцкага раёна 15 студзеня прыняў суддзя Сяргей Кухацкавальц.
Нагадаем, Кастусёва асудзілі да 10 гадоў калоніі. У зняволенні ў Рыгора абвастрыліся праблемы са здароўем — у яго выявілі анкалагічнае захворванне.
У Мінску на этапе мантажу забаранілі выставу мастака Уладзіміра Кандрусевіча
Як паведаміў 16 студзеня "Reform", адкрыццё выставы Уладзіміра Кандрусевіча было запланаванае на 16 студзеня ў Рэспубліканскім тэатры беларускай драматургіі. На ёй мастак меркаваў паказаць творы апошніх гадоў.
У сваіх сацсетках Уладзімір Кандрусевіч паведаміў, што выстава прайшла ўсе этапы ўзгаднення. Падчас мантажу выстава была адменена. Прычыны забароны не вядомыя.
Уладзімір Кандрусевіч – беларускі жывапісец, манументаліст. Вядомы ў тым ліку роспісамі касцёлаў. Пра свае жывапісныя творы аўтар піша:
"Мастак-фігуратывіст з Беларусі. Узнаўляе свет да грэхападзення, дзе на першы план выходзіць чалавечае цела – поўнае жыцця, непрыхаванае, не скаванае вузамі ханжаства і крывадушнасці".
