Хроніка палітычнага пераследу беларусаў 12 снежня Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі" матэрыяламі і фармаваннямі. Праваабарончы цэнтр "Вясна" 12 снежня збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
Дома ў Леаніда Судаленкі адбыўся ператрус
"Па месцы маёй рэгістрацыі ў аграгарадку пад Гомелем зараз скончыўся ператрус. Што шукалі, не казалі, мэблю ад сцен не адсоўвалі, 990 тыс. даляраў пад канапай не знайшлі.
Заўтра мабыць прыйдуць шукаць "іншае садзейнічанне экстрэмісцкай дзейнасці" ў гарадскую кватэру. Крымінальную справу вядзе РАСК па Гомельскаму раёну...", — напісаў Леанід у сацсетках 12 снежня.
У лістападзе 2021-га году Леаніда асудзілі да 3 гадоў зняволення. Праваабаронца выйшаў на волю 21 ліпеня, цалкам адбыўшы свой тэрмін — за кратамі Судаленку ўтрымлівалі два з паловай гады. Праз два тыдні пасля вызвалення ён з'ехаў з Беларусі.
Пастара і служыцеля наваполацкай царквы поўнага Евангелля "Царква Валадарства Божага" арыштавалі на 15 сутак
- Аляксандр Герасімовіч (злева), Вадзім Сафонаў (справа)
Справу пастара царквы Аляксандра Герасімовіча (на фота злева), а таксама служыцеля Вадзіма Сафонава (на фота справа) 12 снежня разглядалі ў раённым судзе. Як паведамляе "Хрысціянская візія", іх абвінавацілі, верагодна, у распаўсюдзе "экстрэмісцкіх" матэрыялаў.
Абодва мужчыны — шматдзетныя бацькі: Аляксандр выхоўвае 7 дзяцей, а Вадзім — 3.
У Магілёве затрыманы былы блогер Алесь Сабалеўскі
- Алесь Сабалеўскі
Як стала вядома MAYDAY.TEAM, раніцай 12 снежня сілавікі затрымалі на працы магіляўчаніна Алеся Сабалеўскага. Прычыны затрымання не ўдакладняюцца.
Верагодна, у дадзены момант Сабалеўскі ў ІЧУ.
Аблава ў Чэрвені: ГУБАЗіК паказаў траіх затрыманых
- Тарас Вяснянка
Адзін з затрыманых 12 снежня, якога ўдалося апазнаць "Нашай Ніве", — гэта 43-гадовы Тарас Вяснянка. Яго вінавацяць у рэпосце з нейкага рэсурсу, прызнанага "экстрэмісцкім".
Пра другога мужчыну вядома, што ён у 2020-м вывешваў беларускі нацыянальны сцяг на даху свайго прыватнага дома. Меркавана, яго вінавацяць у няправільным захоўванні зарэгістраванай зброі, якая на відэа ляжыць проста на паліцах — аніякіх "палітычных" абвінавачанняў яму не закідаюць.
Трэці затрыманы — малады хлопец, які выходзіў у 2020-м на пратэсты. Адметна, што ў відэа дэманструюцца ягоныя нявыдаленыя гісторыі ў інстаграме, якія ён публікаваў для "блізкіх сяброў" і не выдаліў з архіву.
Беларускі саюз мастакоў ліквідаваў суполку "Пагоня"
Пра гэта паведамляе "Радыё Свабода" са спасылкай на "Позірк".
Паводле неафіцыйнай інфармацыі, з саюзу раней выключылі палітзняволенага Генадзя Драздова, які ўзначальваў суполку з 2011 па 2016 год.
Аб’яднанне было створанае 33 гады таму, у 1990 годзе. Яго мэтамі называлася "разьвіццё нацыянальнага мастацтва, зберажэнне і памнажэнне мастацкіх набыткаў культурна-гістарычнай спадчыны дзеля абуджэння нацыянальнай самасвядомасці народу".
Вярхоўны суд прыняў рашэнне аб ліквідацыі Царквы "Новае Жыццё"
Пра гэта 12 снежня паведаміла "Хрысціянская візія".
Царква "Новае жыццё" — гэта рэлігійная абшчына хрысціян поўнага Евангелля. У пачатку 2021 года ўлады горада абвінавацілі суполку ў нямэтавым выкарыстанні ўчастка, на што вернікі сцвярджалі, што іх незаконна пазбавілі права на зямлю.
Чарговае папаўненне Спіса экстрэмісцкіх матэрыялаў
12 снежня ў яго трапілі:
- Telegram-каналы і чаты "Беларусы Батумі Белорусы Батуми", "КОТОС: мясцовае самакіраванне", "Окрестина задержанные", "Публічны чат – Народныя амбасады Беларусі", "Гільдыя Беларусаў";
- Сацсетки праекту "belonews";
- Старонка ў Facebook "Valery Tsepkalo".
ГУБАЗіК затрымаў мужчыну за каментары ў Telegram-каналах
"Пакаяльнае" відэа з затрыманым з'явілася 12 снежня ў праўладным тэлеграм-канале.
Сцвярджаецца, што мужчына нібыта абражаў сілавікоў у "экстрэмісцкіх" Telegram-чатах.
У "спіс тэрарыстаў" унеслі яшчэ аднаго беларуса
Камітэт дзяржаўнай бяспекі 12 снежня абнавіў спіс "асоб, якія маюць дачыненне да тэрарыстычнай дзейнасці" — там з'явіліся прозвішчы яшчэ пяці чалавек.
Сярод іх чатыры грамадзяніна Гаіці, а таксама 31-гадовы беларус Міхаіл Бабошка. Паведамляецца, што ў дачыненні да яго ўступіў у сілу прысуд паводле арт. 130 КК (распальванне варожасці).
Цяпер у "тэрарыстычным спісе" 1150 чалавек, з іх 391 — беларусы (адзначым, што ў спісе КДБ 1159 пазіцыі, аднак 9 чалавек з яго былі выдаленыя раней).
Затрымалі студэнта гомельскага ўніверсітэта, які ладзіў беларускія імпрэзы
- Кастусь Тэнц
Пра гэта "Палескай Вясне" паведамілі аднакурснікі Кастуся Тэнца.
Затрыманне, імаверна, адбылося 8 снежня. Прычыны яго на гэты час невядомыя. Пры гэтым ужо пасля ягонага затрымання нехта заходзіў на ягоную старонку ў сацыяльнай сетцы Укантакце.
Кастусь родам з Рэчыцы. Яшчэ ў дзяцінстве быў вядомы там сваімі перамогамі ў розных відах спорту. У 2019 годзе зацікавіўся беларускай мовай. Наведваў курсы Мова Нанова ў Рэчыцы. Перайшоў сам на беларускую мову. Пасля паступіў у БелДУТ.
Як распавялі аднакурснікі Кастуся, ён часта ва ўніверсітэце ладзіў розныя акцыі для прапаганды беларускай мовы – віктарыны, дыскатэкі з беларускамоўнымі песнямі, экскурсіі ў адметныя беларускія месцы і ў родныя мясціны выбітных беларускіх дзеячоў.
У той жа дзень "Гомельская вясна" паведаміла, што Кастуся Тэнца арыштавалі на 15 сутак.
