У Гомелі затрымліваюць, а ў Верхнядзвінску адпраўляюць на "суткі": хроніка пераследу 31 ліпеня Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі і экстрэмісцкімі фармаваннямі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 31 ліпеня збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
Валянціну Болбат забралі адседжваць прысуджаныя ёй раней 30 сутак
Грамадскую актывістку з Верхнядзвінска Валянціну Болбат раніцай 31 ліпеня міліцыянты забралі з дому.
Як паведамляе "Віцебская вясна" жанчына будзе адбываць адміністрацыйны арышт, прысуджаны ёй раней.
Апрача гэтага, жанчына мае запазычанасці па прысуджаных раней адміністрацыйных штрафах. Усяго Болбат сёлета судзілі паводле арт. 19.11 КаАП і 24.23 КаАП шэсць разоў.
У Гомелі затрыманыя не меней за 9 чалавек
Затрыманыя кажуць пра тое, што прыцягнулі ўвагу «сілавікоў» сваімі падпіскамі ў сацыяльных сетках і мэсэнджарах.
Адзін з мужчын распавёў, што ў яго тэлефоне знайшлі чат-бот «Перамога» і перапіску ў ім. Імаверна, на гэтага чалавека завядуць крымінальную справу.
Пакуль праваабаронцам нічога не вядома пра лёс затрыманых, піша “Гомельская вясна”.
ГУБАЗіК затрымаў слесара завода ЗЛіН у Гомелі
Гомельскі завод ЗЛіН апублікаваў у сябе ў тэлеграм-канале «пакаяльнае» відэа свайго цяпер ужо былога супрацоўніка Віталя Сваткоўскага.
На ім бачна, як мужчыну затрымлівае ГУБАЗіК — яго паклалі на зямлю, а адзін з супрацоўнікаў паставіў на шыю затрыманага калена. Пасля гэтага ў Віталя спыталі якога колеру беларускі сцяг і хто прэзідэнт краіны.
Пазней мужчына быў вымушаны сказаць, што ставіў «лайкі» на «экстрэмісцкія» пасты ў «Аднакласніках». Паведамляецца, што яму прызначылі 25 сутак арышту.
Вярхоўны суд разгледзеў апеляцыю па справе Tut.by — прысуд застаўся без зменаў
Сёння прайшоў разгляд апеляцыі па справе Tut.by у Вярхоўным судзе. Пасяджэнне ішло ў закрытым рэжыме.
Марына Золатава і Людміла Чэкіна — адзіныя фігуранты па справе, якія дагэтуль знаходзяцца за кратамі. Яны прызнаныя палітвязнямі. А КДБ уключыў іх у спіс «Асоб, якія маюць дачыненне да тэрарыстычнай дзейнасці».
Галоўнай рэдактарцы Марыне Золатавай і генеральнай дырэктарцы Людміле Чэкінай суд пакінуў 12 гадоў калоніі агульнага рэжыму.
У Гомелі будуць яшчэ раз судзіць палітзняволенага з Мінска, які адбывае пакаранне ў Ваўкавыску
3 жніўня ў Гомельскім абласным судзе пачнецца працэс, на якім абвінавачаным будзе Аляксей Кудасаў. Ён ужо асуджаны ў Мінску, прызнаны праваабаронцамі палітычным зняволеным, пакаранне адбывае ў Ваўкавыску, паведамляе "Гомельская вясна".
Працэс супраць А. Кудасава будзе весціся па 361-1, па якім ён ужо быў асуджаны, але цяпер па частцы 2 гэтага артыкула - «тыя ж дзеянні, здзейсненыя паўторна». Разглядаць справу будзе суддзя Бобыраў Вадзім.
ГУБАЗіК затрымаў беларуса і прымусілі высмаркацца ў бел-чырвона-белы сцяг і сцяг ЗША
На «пакаяльным відэа» хлопец «прызнаецца» ў тым, што сядзіць у «тэрарыстычных чатах» і «зычыць зла Беларусі».
У канцы відэа затрыманага прымусілі высмаркацца ў нацыянальны беларускі сцяг і сцяг ЗША.
Палітзняволеную актывістку Алену Гнаук перавялі ў жаночую калонію ў Зарэччы
У Чыгуначным раёне Гомеля 28 красавіка агучылі прысуд па трэцяй крымінальнай справе супраць пружанскай актывісткі — 1 год пазбаўлення волі. Канчатковы тэрмін пакарання складае 2 гады і 11 месяцаў зняволення.
Гэтым разам Алену абвінавацілі паводле арт. 411 КК за "злоснае непадпарадкаванне патрабаванням адміністрацыі папраўчай калоніі". Вядома, што ў жаночай калоніі яе часта адпраўлялі ў ШІЗА, а таксама змяшчалі на некалькі месяцаў у ПКТ.
Стала вядома, што нядаўна Алену перавялі ў жаночую калонію № 24 у Зарэччы. У гэтай калоніі ўтрымліваюцца таксама Вікторыя Кульша і Паліна Шарэнда-Панасюк, на якіх увесь час жорстка цісне адміністрацыя.
Падтрымайце жанчыну: ПК № 24. 247526, вул. Вытворчая, 44, г. п. Зарэчча, Рэчыцкі раён, Гомельская вобласць, Алена Пятроўна Гнаук.
Вядомага актывіста з Віцебску Барыса Хамайду асудзілі на 15 сутак
Выданне «Наша Ніва» паведамляе, што 75-гадовага мужчыну затрымалі недалёка ад латвійскай мяжы за вокладку «Пагоня» на пашпарце.
Яго асудзілі да арышту ў судзе Верхнядзвінскага раёна, але падрабязнасцяў, паводле якога менавіта артыкула ён пакараны, сябрам і знаёмым не вядома.
Інфармацыя дапаўняецца.
