За снежань беларускія суды ў крымінальным парадку рэпрэсавалі не менш за 55 чалавек
Суд па "справе Рабочага руху" 9 лістапада. Скрыншот з відэа ATN
Праваабарончы цэнтр "Вясна" ў снежні фіксаваў тэндэнцыю крымінальнага пераследу і асуджэння грамадзян па палітычных матывах. Практыка крымінальнага пераследу ў дачыненні да апанентаў улады ў снежні дапоўнілася вынясеннем прысудаў у парадку завочнай вытворчасці.
Праваабаронцам вядома пра не менш як 55 асуджаных у крымінальным парадку грамадзян, з якіх 43 складаюць мужчыны, 12 – жанчыны.
У дачыненні да двух грамадзян пастаноўленыя абвінаваўчыя прысуды ў парадку завочнага вытворчасці. «Вясне» вядома аб адным грамадзяніне, у дачыненні да якога крымінальны пераслед спынены ў сувязі з заканчэннем тэрмінаў даўнасці прыцягнення да адказнасці.
Сумарна, па вядомых праваабаронцам справах, у снежні суды вынеслі:
268 гадоў 3 месяцы пазбаўлення волі ў дачыненні да 36 чалавек;
5 гадоў абмежавання волі з накіраваннем у папраўчую ўстанову («хімія») у адносінах да 2 чалавек;
39 гадоў абмежавання волі без накіравання ў папраўчую ўстанову (»хатняя хімія") у дачыненні да 16 чалавек;
3 месяцы арышту для аднаго чалавека;
5000 базавых велічынь штрафу на суму 160000 рублёў у якасці дадатковага пакарання ў дачыненні да 16 чалавек разам з пазбаўленнем (для 15 асуджаных) і абмежаваннем волі без накіравання ў папраўчую ўстанову (для аднаго чалавека);
прымусовае лячэнне ў дачыненні да аднаго чалавека разам з пазбаўленнем волі;
5 гадоў пазбаўлення права займаць пасады, звязаныя з праходжаннем службы ў праваахоўных органах;
Паводле вядомых праваабаронцаў прысудаў у снежні суды ўжывалі пакаранне, звязанае з пазбаўленнем волі, у 65.45% выпадкаў. Абмежаванне волі з накіраваннем у ПУАТ («хімія») суды выкарыстоўвалі ў якасці пакарання ў 3.64% выпадкаў. Абмежаванне волі без накіравання ў ПУАТ (“хатняя хімія") ужывалася ў 29.1% выпадках асуджэння грамадзян. Арышт суды ўжывалі ў 1.81% выпадкаў асуджэння фігурантаў палітычных спраў.
Такім чынам, у снежні пакаранне па палітычна матываваных крымінальных справах, звязанае з пазбаўленнем волі, яе абмежаваннем у выглядзе «хіміі» і «хатняй хіміі» суды ўжывалі ў 100% выпадках асуджэння фігурантаў палітычна матываваных крымінальных спраў.
За лістапад суды ў крымінальным парадку рэпрэсавалі не менш за 89 чалавек
