Палітвязня асудзілі па "справе Зельцэра" за абразу прадстаўніка ўлады

У Пінскім судзе вынеслі прысуд паводле арт. 369 Крымінальнага кодэкса (Абраза прадстаўніка ўлады) палітзняволенаму Алегу Корзуну. Справу разглядаў суддзя Андрэй Бычыла.

Алег Корзун

Алег Корзун быў затрыманы па крымінальнай справе, узбуджанай за каментары ў інтэрнэце пасля гібелі ў мінскай кватэры супрацоўніка КДБ Дзмітрыя Федасюка і it-спецыяліста Андрэя Зельцэра. У канцы лістапада 2021 стала вядома, што Алега перавялі са Следчай турмы № 8 у Брэсцкі СІЗА. Першапачаткова Алега абвінавачвалі паводле артыкулаў 130 і 369 Крымінальнага кодэксу, але пазней абвінавачанне ў “распальванні іншай сацыяльнай варожасці” знялі.

7 кастрычніка суддзя Пінскага суда Андрэй Бычыла прызнаў Алега Корзуна вінаватым паводле арт. 369 Крымінальнага кодэкса (Абраза прадстаўніка ўлады) і прызначыў яму пакаранне тэрмінам на 2 гады пазбаўлення волі ў калоніі ва ўмовах агульнага рэжыму. Таксама Алегу прысудзілі штраф памерам 100 базавых велічыняў.

Падтрымайце Алега Корзуна пасылкамі, грашовымі пераводамі і тэлеграмамі: СІЗА-7. 224030, г. Брэст, вул. Савецкіх памежнікаў, 37 (Корзун Алег Віктаравіч).