За дапамогу рэпрэсаваным да двух гадоў калоніі асудзілі Вольгу Ялцэвіч
Вольга Ялцэвіч
Суд Маскоўскага раёна Брэста 15 ліпеня вынес прысуд па крымінальнай справе жыхаркі Докшыцаў Вольгі Ялцэвіч па абвінавачванні ў фінансаванні пратэстнай дзейнасці (ч. 2 арт. 342 Крымінальнага кодэкса).
Справу разглядаў суддзя Яўген Брэган.
Палітзняволеная Вольга Ялцэвіч была затрыманая 12 снежня 2021 года і да суда змешчаная пад варту ў СІЗА № 7.
Жанчына мае юрыдычную адукацыю, да затрымання аказвала юрыдычныя паслугі ў якасці прыватнага прадпрымальніка.
Згодна з матэрыяламі следства Вольга Ялцэвіч не пазней за 12 жніўня 2020 года на розных інтэрнэт-рэсурсах ад імя аднаго з замежных фондаў апублікавала інфармацыю аб зборы грошай для падтрымкі грамадзян, якія прымалі ўдзел у несанкцыянаваных масавых мерапрыемствах на тэрыторыі Рэспублікі Беларусь.
Абвінавачаная, з'яўляючыся сябрам Фонду, сумесна з яго кіраўніком і іншымі асобамі з 13 жніўня па 19 снежня 2020 года нібыта аплочвала сумы накладзеных на правапарушальнікаў грашовых спагнанняў, паслугі адвакатаў, дзяржаўную пошліну за падачу скаргаў, аказанне іншай матэрыяльнай дапамогі гэтай катэгорыі грамадзян, а таксама зрабіла пералік сродкаў у кошт пакрыцця шкоды, нанесенай дзяржаве супрацьпраўнымі дзеяннямі.
У ходзе судовага працэсу Ялцэвіч часткова адмовілася ад раней дадзеных паказанняў.
Адзін з дапытаных сведкаў замест таго, каб пацвердзіць, што штраф яму выплаціў фонд "Краіна для жыцця", даў паказанні, што штраф яму быў аплочаны сваяком.
На працэсе таксама высветлілася, што Вольгу 5 разоў змяшчалі ў карцар, а яшчэ ў СІЗА паставілі на прафулік.
Суд прызнаў Ялцэвіч вінаватай і пакараў яе пазбаўленнем волі ў калоніі агульнага рэжыму тэрмінам на два гады.
За фінансаванне пратэстнай дзейнасці ў Берасці будуць судзіць палітзняволеную Вольгу Ялцэвіч
