Мужчына з Бярозы ледзь паспеў адбыць тэрмін за абразу амапаўца, як атрымаў новы — за абразу супрацоўніка ІСН
21 чэрвеня суд Бярозаўскага раёна вынес рашэнне па справе Юрыя Юдчыца, якога абвінавачвалі ў здзяйсненні злачынства паводле арт. 369 КК "Абраза прадстаўніка ўлады".
Судовае пасяджэнне ўзначаліла Наталля Вакульчык.
Пра абвінавачанага вядома, што Юрыю Юдчыцу 35 гадоў, ён мае непаўнагадовае дзіця і да нядаўняга часу жыў у Бярозе, але цяпер пражывае ў Мінску. На судовае пасяджэнне мужчына прыйшоў проста напярэдадні свайго першага працоўнага дня на новым месцы. Мужчына аказаўся беспрацоўным пасля папярэдняй крымінальнай справы — у гэтым жа годзе паводле арт. 369 яго абвінавацілі ў абразе амапаўца з УУС Брэсцкага гарвыканкама Уладзіслава Шукаева. У "ВКонтакте" мужчына напісаў пра яго каментар "Пазыўны — дрышч". 23 сакавіка 2022 года суддзя суда Бярозаўскага раёна Дзмітрый Кавалевіч прызнаў Юдчыца вінаватым і асудзіў да трох месяцаў арышту, якія Юрый адбыў.
![]()
За слова "дрышч" мінчука асудзілі да трох месяцаў арышту
Але як толькі мужчына вызваліўся, на яго зноў завялі крымінальную справу, і зноў — за абразу супрацоўніка міліцыі. Гэтым разам пацярпелым аказаўся начальнік інспекцыі па справах непаўнагадовых Бярозаўскага РАУС Дзмітрый Лішко.
Ад адваката Юрый Юдчыц адмовіўся — гэтак жа, як і падчас свайго першага суда паводле арт. 369 КК. Абвінавачаны адзначыў, што з цяжкім матэрыяльным становішчам ягоная адмова ад абароны не звязаная.
Юрыя Юдчыца абвінавацілі ў тым, што 27 лютага 2021 "у нявысветлены час у нявызначаным месцы" ў сацсетцы "ВКонтакте", у публічнай групе "NEXTA" ён размясціў каментар пад здымкам пацярпелага. Пра якое менавіта паведамленне ідзе гаворка, на судзе не прагучала, але, як зачытаў пракурор, "у каментары ўтрымоўваліся непрыстойныя, з негатыўнай ацэнкай асобы пацярпелага выказванні".
На судзе Лішко расказаў, як дазнаўся пра каментар у свой адрас:
"Пра абразу паведамілі калегі, якія займаюцца аналізам сацсетак. Яны назвалі прозвішча абвінавачанага. Я адразу зразумеў: прозвішча Юдчыц — бярозаўскае, значыцца — з Бярозы. Але асабіста абвінавачанага я не ведаю, ніякіх непрыязных адносін паміж намі няма, нагодаў для абразы таксама. Непрыемная сітуацыя. Калі абвінавачанага выклікалі ў міліцыю, мне патэлефанавалі супрацоўнікі, прапанавалі падысці і пабачыць Юдчыца. Я прыйшоў, запытаў яго, завошта ён мяне абразіў. Ён паціснуў плячамі і сказаў: "Прабач". Той каментар велізарная колькасць людзей прачытала, напісалі шмат негатыўнага… Я напісаў заяву".
У судзе пацярпелы Лішко заявіў хадайніцтва: папрасіў далучыць да матэрыялаў справы пазоўную заяву з просьбай спагнаць з Юдчыца 1500 рублёў — у такую суму пацярпелы ацаніў свае маральныя пакуты, якія, як ён кажа, выяўляліся "ў адчуванні прыніжэння ягонага гонару і годнасці ў вачах неабмежаванай колькасці асобаў". Лішко сказаў, што ўсю пазначаную суму ён мае намер накіраваць на дабрачыннасць.
Юрый Юдчыц прызнаў сваю віну, а суду растлумачыў, што не памятае ані акалічнасцяў, ані дакладнага часу напісання каментара, пра які ідзе гаворка.
"Гэта было ўжо год таму, мой тэлефон у прыбытак дзяржавы забралі яшчэ пасля суда па першай справе аб абразе, але дапускаю, што тэкст сапраўды быў напісаны з майго мабільнага тэлефона", — растлумачыў мужчына.
Паводле абвінавачанага, той каментар яму паказалі ўжо супрацоўнікі міліцыі. І ён быў зроблены з акаўнта "Юрый Юдчыц" у "ВКонтакте".
Падчас спрэчак бакоў пацярпелы сказаў:
"Перад тым як штосьці рабіць, трэба думаць. Пазоў падтрымліваю ў поўным аб'ёме".
Абвінавачаны прынёс прабачэнні пацярпеламу, папрасіў суд строга не караць за правіннасць і адзначыў, што сума пазову, выстаўленага Лішко, для яго завялікая. Таму ён падтрымлівае яе часткова, сума — на вырашэнне суда.
У сваім апошнім слове Юрый Юдчыц паабяцаў надалей не здзяйсняць падобнага і сказаў, што ўсвядоміў усю ступень адказнасці за такія каментары ў інтэрнэце.
Суд Бярозаўскага раёна прызнаў Юрыя Юдчыца вінаватым у здзяйсненні злачынства паводле арт. 369 КК і прызначыў яму пакаранне ў выглядзе двух гадоў абмежавання волі без накіравання ў папраўчую ўстанову адкрытага тыпу. У тэрмін адбывання пакарання суд пастанавіў залічыць тэрмін ужо адбытага пакарання па папярэдняй крымінальнай справе паводле арт. 369 КК. У якасці маральнай кампенсацыі суд абавязаў Юдчыца выплаціць Лішко 1000 беларускіх рублёў, а таксама 96 рублёў дзяржмыты.
Прысуд не набыў моц і можа быць абскарджаны і апратэставаны ў вызначаныя заканадаўствам тэрміны.