Падтрымай палітзняволеных прадстаўнікоў медыя ў Дзень салідарнасці з Беларуссю
Па прапанове Святланы Ціханоўскай 9 лютага адзначаецца Міжнародны дзень салідарнасці з Беларуссю, у які ўсіх жадаючых заклікаюць падтрымаць незалежныя медыя і зняволеных журналістаў.
Цягам 2021 года шматлікія незалежныя СМІ і медыя-рэсурсы Беларусі былі разгромленыя з мэтай стварэння інфармацыйнага вакуума ў краіне: у журналістаў праводзілі вобшукі дома і на офісах, канфіскоўвалі тэхніку, а саміх іх затрымлівалі па адміністрацыйных і крымінальных справах. Сайты незалежных СМІ былі заблакаваныя на тэрыторыі Беларусі, інфармацыя большасці з іх была прызнаная экстрэмісцкай, а некаторыя СМІ нават былі прызнаныя экстрэмісцкімі фарміраваннямі – Белсат, “Наша Ніва”, Радыё Свабода, БелаПАН.
Па дадзеных Беларускай асацыяцыі журналістаў зараз за кратамі знаходзіцца 33 прадстаўнікі медыя, 32 з іх прызнаныя палітзняволенымі.
- Кацярына Андрэева, журналістка тэлеканала "Белсат"
- Дар'я Чульцова, журналістка тэлеканала "Белсат"
- Ігар Лосік, кансультант "Радыё Свабода"
- Аляксандр Івулін, журналіст Tribuna
- Ксенія Луцкіна, былая журналістка «Беларусь 2»
- Андрэй Аляксандраў, медыя-менеджар
- Дзяніс Івашын, журналіст-фрылансер, "Новы Час", InformNapalm
- Анджэй Пачобут, журналіст, член "Саюза палякаў у Беларусі"
- Марына Золатава, галоўны рэдактар ТУТ.бай
- Вольга Лойка, рэдактар ТУТ.бай
- Людміла Чэкіна, генеральны дырэктар ТУТ.бай
- Алена Талкачова, журналіст ТУТ.бай
- Анжэла Асад, галоўны бухгалтар ТУТ.бай
- Ірына Рыбалка, намеснік дырэктара ТУТ.бай
- Ала Лапатка, галоўны інжынер ТУТ.бай
- Дар'я Данілава, RocketData, TAM.BY
- Марыя Новік, намеснік галоўнага бухгалтара ТУТ.бай
- Аляксандр Дайнэка, намеснік дырэктара ТУТ.бай
- Андрэей Аўдзееў, менеджар ТУТ.бай
- Кацярына Ткачэнка, юрыст ТУТ.бай — хатні арышт
- Ірына Касцючэнка, былая юрыстка ТУТ.бай — хатні арышт
- Валерыя Касцюгова, рэдактар "Беларускага штогодніка", палітолаг
- Ягор Марціновіч, галоўны рэдактар "Нашай Нівы"
- Андрэй Скурко, кіраўнік аддзела рэкламы і маркетынгу "Нашай Нівы"
- Ірына Леўшына, дырэктар, галоўны рэдактар БелаПАН
- Дзмітрый Наважылаў, экс-дырэктар БелаПАН
- Генадзь Мажэйка, журналіст "Камсамольскай праўды ў Беларусі»
- Ірына Слаўнікава, журналіст
- Андрэй Кузнечык, фрылансер "Радыё Свабода"
- Алег Груздзіловіч, журналіст "Радыё Свабода"
- Сяргей Сацук, галоўны рэдактар "Ежедневника"
Як падтрымаць падтрымаць журналістаў?
1. Лісты салідарнасці – наймацнейшая падтрымка звонку. Падпісвайце паштоўкі, пішыце лісты і дасылайце словы падтрымкі прадстаўнікам медыя.
Адпраўляць лісты можна праз звычайную пошту, а таксама праз электронныя сэрвісы:
Таксама прапануем дасылаць палітвязням тэлеграмы. Гэта можна зрабіць на пошце або па нумару тэлефона 166 (толькі з гарадскога) і надыктаваць тэкст. Не забывайце пакідаць сваё імя ў тэксце тэлеграмы.
2. Не менш значная падтрымка – распаўсюд інфармацыі. Распавядайце пра палітвязняў сваім блізкім, сябрам, калегам ды наўпрост у сацыяльных сетках. Так найбольшая колькасць людзей зможа даведацца пра гісторыі зняволеных і праявіць сваю салідарнасць з імі! Выкарыстоўвайце хэштэгі #FreedomLetters і #StandWithBelarus.
Толькі для тых, хто ўтрымліваецца ў СІЗА да суда:
3. Можна зрабіць грашовыя пераводы журналістам у следчыя ізалятары, каб яны змаглі сабе набыць, напрыклад, маркі, канверты і паштоўкі, каб адказаць на лісты салідарнасці і таксама павіншаваць сваіх блізкіх са святамі.
4. Даслаць пасылку ці бандэрольку з рознымі смачняшкамі і прыемнымі дробязямі. Гэта вялікая дапамога сем’ям вязняў і добрая падтрымка саміх зняволеных, асабліва ў святы. Калі ласка, не трэба адносіць палітвязням перадачы без узгаднення са сваякамі, бо ў СІЗА ўстаноўлены ліміт на перадачы па вазе – 30 кг на месяц. Пры гэтым пасылкі маюць абмежаванні толькі ад пошты – ў адной пасылцы можна адсылаць рэчаў да 50 кг за раз.
У бандэроль ці пасылку можна пакласці гарэхі, курагу, фінікі, цукаты, цукеркі, зефір, мармелад, пасцілу, халву, шакалад, печыва, сухары, апельсіны, мандарыны, грушы, яблыкі, лімоны, каву любую, чай ліставы, суп, бульбу і макароны, вяленае мяса, каўбасу (сыравяленая, сыравэнджаная), салёнае сала, салёную рыбу, сыр, цыбулю рэпчатую, свежую зеляніну, часнык, агуркі, памідоры, перац, канверты, маркі, аркушы паперы, асадкі, фламастары, алоўкі, сшыткі, цыгарэты, запалкі ды іншае.
