viasna on patreon

“Не толькі Бродскі”: акцыя вершаў у падтрымку зняволенага вясноўца Уладзя Лабковіча

2021 2021-11-23T14:55:46+0300 2021-11-23T15:54:34+0300 be https://spring96.org/files/images/sources/labkovich_uladz5.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Праваабаронца Уладзімір Лабковіч. Фота Радыё Свабода

Праваабаронца Уладзімір Лабковіч. Фота Радыё Свабода

За кратамі на «Валадарцы» ўжо больш за чатыры месяцы ўтрымліваецца палітзняволены праваабаронца “Вясны” Уладзімір Лабковіч. У нядаўнім лісце Уладзь падзяліўся, што цяпер чытае вершы Бродскага, асабліва, “Письмо Генералу Z”, “Письмо Римскому другу”, “Сонет”.

“Днямі да мяне прарваўся першы ліст за чатыры месяцы ад Уладзя. У ім ён напісаў, што цяпер асабліва ўчытваецца і знаходзіць сябе ў вершах Іосіфа Бродскага. І сапраўды, увесь яго ліст прасякнуты атмасферай яго вершаў. Зразумела, што ў засценках “Валадаркі” ў Уладзя пануе такі настрой, але хочацца з ім падзяліцца настроямі людзей, якія яму пакуль недасяжныя.

Беларусы і беларускі працягваюць верыць у лепшае для нашай краіны і робяць усё магчымае для гэтага, нягледзячы на тое, што сітуацыя ў Беларусі, мякка кажучы, сапраўды часта нагадвае некаторыя вершы Бродскага. Калі сёння мы можам сабе выбраць кампанію (ці то з людзей, ці то з кніг, тэатру, фільмаў), то палітвязні, відавочна, — не. Таму трэба дзяліцца з імі ўсім, што ў нас ёсць, усімі магчымымі спосабамі. У дадзенай сітуацыі — натхненнем беларусаў і іх нязломнай верай у сябе і ў адзін аднога”, — кажа праваабаронца “Вясны” Дзіяна Пінчук.

Нядаўна мы праводзілі конкурс ілюстрацый “Кот на Валадарцы” ў падтрымку зняволенага вясноўца Валянціна Стэфановіча. Беларускія мастакі і мастачкі, палітзняволеныя, замежныя студэнты і нават дзеткі дасылалі Валянціну ў СІЗА-1 шмат карцінак катоў. Гэта вельмі падтрымала як яго самога, так і яго сям’ю.

“Цяпер мы заклікаем паўдзельнічаць у акцыі “Не толькі Бродскі” у падтрымку Уладзя Лабковіча паэтаў і паэтак, беларусаў, у якіх ёсць талент пісаць вершы. Таксама можна проста падзяліцца вершам, які падтрымлівае і натхняе вас у гэтыя складаныя часы. Вельмі хочацца данесці да Уладзя настроі нязломных беларусаў і беларусак на мове вершаў — ён іх вельмі разумее”, — падкрэслівае Дзіяна Пінчук.

Як паўдзельнічаць у акцыі?

Напісаць вашыя ўласныя вершы ці абраць вершы розных аўтараў, размясціць іх у сацсетках з хэштэгам #FreeViasna або даслаць нам на пошту freeviasna@gmail.com. У акцыі могуць прыняць удзел як паэты, так і ўсе неабыякавыя людзі.

І абавязкова дасылайце вершы Уладзю ў СІЗА:

СІЗА-1, 220030, г. Мінск, вул. Валадарскага, 2,

Уладзіміру Мікалаевічу Лабковічу

Нагадаем, цяпер у Беларусі 884 палітзняволеных — гэта абсалютны антырэкорд у гісторыі нашай краіны. За кожнай лічбай стаіць чалавек, яго ўнікальная гісторыя і душа. Усім ім патрэбная падтрымка, надзея і вера ў іх. Сярод гэтай агромністай лічбы — сем праваабаронцаў “Вясны”, якіх утрымліваюць за кратамі толькі за тое, што яны абаранялі правы чалавека ў Беларусі і ў нейкі момант сталі нязручнымі для ўладаў.

Уладзімір Лабковіч – юрыст Праваабарончага цэнтра “Вясна”, каардынатар кампаніі “Праваабаронцы за свабодныя выбары”. Затрыманы з іншымі вясноўцамі 14 ліпеня і змешчаны пад варту. Уладзя, як і старшыню “Вясны” Алеся Бяляцкага і яго намесніка Валянціна Стэфановіча, абвінавачваюць у нясплате падаткаў па ч. 2 арт. 243 Крымінальнага кодэкса.

Апошнія навіны

Партнёрства

Сяброўства