14 гадоў калоніі, штраф і пазбаўленне права займаць кіраўнічыя пасады — агучылі прысуд палітзняволенаму экс-банкіру Віктару Бабарыку Дапоўнена
У судзе Маскоўскага раёна Мінска 6 ліпеня агучылі прысуды па гучнай і рэзананснай «справе Белгазпрамбанка», фігурантам якой з'яўляецца палітзняволены экс-банкір, былы кандыдат на пасаду прэзідэнта Беларусі Віктар Бабарыка. Для яго пракурор Сяргей Гіргель запрасіў 15 гадоў пазбаўлення волі ў калоніі ўзмоцненага рэжыму. Суддзя Вярхоўнага суда Ігар Любавіцкі пакараў яго 14-мі гадамі калоніі ва ўмовах узмоцненага рэжыму, прызнаўшы Віктара Бабарыку вінаватым у атрыманні хабару ў асабліва буйным памеры (ч. 3 арт. 430 КК) і ў легалізацыі сродкаў, атрыманых злачынным шляхам (ч. 2 арт. 235 КК). Акрамя гэтага, палітвязня пакаралі штрафам у памеры 145 тысяч рублёй (пяць тысяч базавых велічыняў), а таксама ён павінен будзе выплаціць больш за 46 мільёнаў рублёў, каб пагасіць нібыта прычыненую ім шкоду. Таксама Віктара пазбавілі права займаць кіраўнічыя пасады на некаторы час. Віктар Бабарыка віну не прызнаў. Іншых фігурантаў «справы Белгазпрамбанка» пазбавілі волі на тэрміны ад 3 да 6,5 гадоў калоніі, аднаго асудзілі да 5 гадоў "хатняй хіміі". Пакаранне абскарджванню не падлягае.
- Віктар Бабарыка. Фота: dev.by
Па версіі абвінавачвання, Віктар Бабарыка "стварыў устойлівую групу з ліку службовых асобаў банка" і кіраваў ёю з "мэтай працяглага, нявызначанага па працягласці здзяйснення злачынства". Злачынная дзейнасць групы заключалася ў "сістэматычным атрыманні хабараў самім Бабарыка і іншымі ўдзельнікамі злачыннай групы".
6 ліпеня на суд Віктара Бабарыку прыйшлі падтрымаць дзясяткі людзей, якія выбудаваліся ў доўгую чаргу, каб патрапіць на паседжанне. Тых, хто не патрапіў у залю суда, міліцыянты прасілі разысціся. Адвакатаў сустрэлі воплескамі. Да суда пад'ехалі аўтазакі і бусы з сілавікамі ў балаклавах. Пасля паседжання затрымалі як мінімум двух чалавек.
Адзін з адвакатаў Бабарыка распавёў Onliner пра прысуды іншым фігурантам "справы Белгазпрамбанка":
- Шабан — 6 гадоў пазбаўлення волі;
- Кузьміч — 6,5 гадоў пазбаўлення волі;
- Ільясюк, Дабралёт, Бадзей — 5,5 гадоў пазбаўлення волі;
- Кабяк — 3 гадоў пазбаўлення волі;
- Задойка — 5 гадоў "хатняй хіміі".
Інфармацыя дапаўняецца.
Хто яшчэ праходзіў па «справе Белгазпрамбанка»?
Нагадаем, суд над топ-мэнэджарамі "Белгазпрамбанка" пачаўся 17 лютага. У справе 122 тамы, працэс цягнуўся 5 месяцаў, у судзе дапыталі больш за 50 чалавек. Віктар Бабарыка абвінавачваўся ў "адмыванні" сродкаў, атрыманых злачынным шляхам (ч. 2 арт. 235 КК), і атрыманні хабару ў асабліва буйным памеры (ч. 3 арт. 430 КК, Аляксей Задойка (былы першы намеснік старшыні праўлення Белгазпрамбанка), Кірыл Бадзей (в. а. старшыні праўлення Белгазпрамбанка пасля сыходу Бабарыка), Сяргей Шабан (намеснік старшыні праўлення Белгазпрамбанка), Дзмітрый Кузьміч (намеснік старшыні праўлення банка), Аляксандр Ільясюк (намеснік старшыні праўлення банка), Сяргей Дабралёт (былы намеснік старшыні праўлення банка) абвінавачваюцца ў атрыманні хабару ў асабліва буйным памеры. Віктар Кабяк (заснавальнік кампаніі «Активлизинг») абвінавачваецца ў дачы хабару паўторна альбо ў буйным памеры. З Бадзеем, Дабралетам, Кузьмічом, Ільясюком, Шабанам, Кабяком заключаны дасудовыя пагадненні аб супрацоўніцтве.
Віктар Бабарыка быў затрыманы 18 чэрвеня разам з сынам Эдуардам, калі накіроўваўся ў ЦВК для здачы сабраных подпісаў. Затрыманне праводзіў Дэпартамент фінансавых расследаванняў Камітэта дзяржкантролю. Цэлы дзень да затрыманых не пускалі адвакатаў: у будынку ДФР "праводзіліся вучэнні". У гэты ж дзень Віктар Бабарыка быў змешчаны ў СІЗА КДБ, дзе знаходзіцца да гэтага дня.
Віктар Бабарыка не прызнаў віны ў злачынствах, у якіх яго вінавацяць. Усе астатнія сем абвінавачаных віну прызналі.
«Справа аб паразе ў правах Віктара Бабарыкі» – прамова адваката палітвязня па «справе Белгазпрамбанка»
«Не магу прызнаць злачынства, якога не рабіў», – Бабарыка выступіў з апошнім словам у судзе
