Палітвязням Ігару Лосіку і Мікалаю Статкевічу прад'явілі новыя абвінавачванні Дапоўнена
Ігар Лосік і Мікалай Статкевіч
Як паведамляецца ў тэлеграм-канале "Беларусь галаўнога мозгу", палітвязню Ігару Лосіку прад'явілі абвінавачванне па п. 13 ч. 2 арт. 293 Крымінальнага кодэкса - "падрыхтоўка да ўдзелу ў масавых беспарадках". Відавочна, зроблена гэта з мэтай пакінуць палітзняволенага пад вартай, так як 25 снежня мінае гранічны тэрмін яго ўтрымання па папярэднім абвінавачванні.
У знак пратэсту Ігар Лосік абвясціў безтэрміновую галадоўку.
Дапоўнена: жонка Ігара, Дар'я Лосік у знак салідарнасці з мужам абвясціла галадоўку. Пра гэта яна напісала ў сваім Instagram.
"Супраць нашай сям'і абвешчаны генацыд, што змушае нас ісці на крайнія меры…"
Таксама сёння стала вядома, што такое ж абвінавачанне выставілі іншаму палітвязню - Міколу Статкевічу. Пра гэта паведаміла на сваёй старонцы ў фэйсбуку ягоная жонка Марына Адамовіч.
"Папярэдні артыкул не дазваляў трымаць у СІЗА больш за шэсць месяцаў. Сёння - 198 дзён, як Мікалай Статкевіч за кратамі", - адзначыла Марына Адамовіч.
Нагадаем, 25 чэрвеня ў доме ў Баранавічах, дзе жыве адміністратар тэлеграм-канала "Беларусь головного мозга" Ігар Лосік з сям'ёй, прайшоў вобшук, пасля якога Ігара затрымалі. Увечары таго ж дня стала вядома, што ў дачыненні да мужчыны завялі крымінальную справу па арт. 342 Крымінальнага кодэксу. Ён быў прызнаны палітзняволеным.
Апазіцыйны палітык Мікалай Статкевіч быў затрыманы 31 траўня па дарозе на Камароўскі рынак у Мінску, дзе ён збіраўся наведаць перадвыбарчы пікет Святланы Ціханоўскай. 30 чэрвеня мужчына павінен быў выйсці на волю пасля 30 сутак адміністрацыйнага арышту, аднак напярэдадні стала вядома, што палітык падазраецца ў здзяйсненні злачынства па ч. 1 арт. 342 Крымінальнага кодэксу. Таксама быў прызнаны палітзняволеным.
