У Гародні судзяць жанчыну, якая ўкусіла супрацоўніцу АМАП
Марына Палікарпава. Фота: belapan.by
У судзе Ленінскага раёна Гародні 7 снежня пачаўся разгляд крымінальнай справы мясцовай жыхаркі Марыны Палікарпавай, якую абвінавачваюць у гвалце ў дачыненні да жанчын-міліцыянераў (арт. 364 Крымінальнага кодэксу - гвалт альбо пагроза прымянення гвалту ў дачыненні да супрацоўніка органаў унутраных спраў).
Справу разглядае суддзя Руслан Гурын.
Пацярпелыя — жанчыны-міліцыянеры Дар’я Бандарчук і Марыя Мазуркевіч.
Як паведамляюць naviny.media, 55-гадовая Палікарпава працуе правізарам у аптэцы. Яе затрымалі 9 жніўня ў цэнтры горада за ўдзел у мітынгу, асудзілі на трое сутак. Падчас жорсткага затрымання яна ўкусіла адну з жанчын-міліцыянераў, другую — ударыла. Згодна з дзяржабвінавачаннем, Палікарпава позна ўвечары 9 жніўня прымала ўдзел у мітынгу ў цэнтры горада, за што яе і затрымалі.
- У судзе над Марынай Палікарпавай. Фота: belapan.by
Па матэрыялах следства, яна ўкусіла Бандарчук за руку і ўдарыла Мазуркевіч, зрабіла гэта наўмысна, каб перашкодзіць іх законнай дзейнасці. Палікарпава віну не прызнала. Яна патлумачыла, што канфлікт у міліцэйскай машыне адбыўся з-за таго, што жанчыны-міліцыянеры яе абразілі. Яны прадставіліся ёй Машай і Насцяй Лукашэнка, надзелі кайданкі і збілі. Бандарчук прымяніла да Палікарпавай задушлівы прыём, і тая ўкусіла яе за руку ў мэтах абароны. „Я рэальна спалохалася за сваё жыццё”, — патлумачыла абвінавачваная.
Супрацоўніцы міліцыі Марыя Мазуркевіч і Дар'я Бандарчук запрасілі ў суда таксама па 5 тысяч рублёў кампенсацыі.
Пасля суда жанчыне спатрэбілася медыцынская дапамога — у яе было галавакружэнне і млоснасць. Палікарпавай выклікалі хуткую і адвезлі ў бальніцу, дзе правялі абследаванне.
"Укусіла міліцыянта, каб спыніць гвалт над мужам". Што пастанавіў суд
