У Мінску затрыманы паэт і бард Эдуард Акулін
Эдуард Акулін. Фота з сацыяльных сетак.
Раніцай 26 кастрычніка ў Мінску амапаўцы затрымалі вядомага беларускага паэта і барда Эдуарда Акуліна. Блізкія паведамляюць, што ён стаяў у Ланцугу салідарнасці ў Малінаўцы.
Затрыманне адбылося якраз у дзень народзінаў славутага паэта Анатоля Сыса, дзеля ўшанавання памяці якога бельмі шмат рабіў і робіць Эдуард.
Шчыры і самаахвярны беларус Акулін знаходзіў час паміж напісаннем вершаў ладзіць прэзентацыі і выступы перад чытачамі. Ягоныя творы грамадскага гучання, якія амаль штодня з’яўляюцца на старонцы ў фэйсбуку, прасякнутыя верай ў перамогу Святла над Цемрай, праўды над хлуснёй.
За два дні да свайго затрымання Акулін апублікаваў верш “Выходзь на Грунвальдскае поле!”:
Выходзь на Грунвальдскае поле!
Каб адстаяць навекі Волю,
якая нам даецца звыш, –
выходзь на Грунвальдскае поле!
– А дзе яно? – Дзе ты стаіш!
Каб больш не быць рабом ніколі,
каб дачакацца сонца з хмар, –
выходзь на Грунвальдскае поле!
– А дзе яно? – Дзе кроў ахвяр!
Каб скінуць з плеч ярмо няволі,
каб прамінулі дні нягод, –
выходзь на Грунвальдскае поле!
– А дзе яно? – Дзе ўвесь Народ!
Каб больш цябе ніхто й ніколі
не біў дубцом па галаве, –
выходзь на Грунвальдскае поле!
– А дзе яно? – Дзе Бог жыве!
Каб стацца вершнікам з Пагоні,
каб выгнаць з краю чорнагнусь, –
выходзь на Грунвальдскае поле!
– А дзе яно? – Дзе Беларусь!
Эдуард Акулін не першы паэт, якога ў гэтыя дні закранула рэпрэсіўная машына аганізуючай улады. Так, 21 кастрычніка стала вядома, што пасля 11 гадзін раніцы паэт, сябра Саюза беларускіх пісьменнікаў і Беларускага ПЭНа Дзмітры Строцаў перастаў выходзіць на сувязь з блізкімі і сябрамі. 22 кастрычніка паэт Дзмітры Строцаў атрымаў 13 сутак арышту. Строцаў удзельнічаў у акцыях пратэсту супраць фальсіфікацыі вынікаў выбараў і адкрыта пісаў пра гэта.
Сапраўды, гучнае і колкае паэтычнае слова муляе ўладам і яны затыкаюць рот творцам, пазбаўляючы іх волі.
