У Слуцку затрыманы абласны каардынатар Руху «За Свабоду» і двое актывістаў
Віталь Амяльковіч. Фота: рух.by
Пад час расклейкі плакатаў з заклікам святкаваць 100-годдзе БНР (ад арганізатараў святкавання ля Опернага тэатра ў Мінску) у Слуцку затрыманы мінскі абласны каардынатар Руху «За Свабоду» Віталь Амяльковіч і яшчэ двое мясцовых актывістаў.
«Мы расклейвалі плакаты, падрыхтаваныя арганізатарамі свята ля Опернага тэатра ў Мінску. У прыватнасці там былі слоганы «Святкуем разам» і іншыя», — распавёў сайту Pyx.by Амяльковіч.
Па ягоных словах, па стане на вечар 23 сакавіка ён, а таксама актывісты Юрый Мяцельскі і Матанскі знаходзяцца ў РАУС, ідзе працэдура высвятлення іх асобаў.
Затрыманне пацвердзілі і ў мясцовым аддзяленні міліцыі. "Праводзіцца праверка", - паведаміў дзяржурны РАУС.
Роўна год таму Віталь Амяльковіч таксама быў затрыманы напярэдадні 25 сакавіка.
