Аліна Стэфановіч паскарділася на “Белсаюздрук” з-за дыскрымінацыі па моўнай прыкмеце

2013 2013-12-05T10:21:23+0300 2013-12-05T10:33:14+0300 be http://spring96.org/files/images/sources/belsajuzdruk-1.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

10 кастрычніка гандлярка сталічнага шапіка № 184 ГРУП “Белсаюздрук” не прадала жыхарцы Мінска Аліне Стэфановіч звычайныя алоўкі па прычыне… няведання гэтага слова на беларускай мове. Фактычна грамадзянцы Беларусі было адмоўлена ў абслугоўванні з-за не разумення дзяржаўнай мовы гандляром.

Абураная такім стаўленнем да мовы Стэфановіч пакінула адпаведны запіс  у Кнізе скаргаў і прапановаў.

25 кастрычніка намеснік дырэктара гандлёвага рэспубліканскага  ўнітарнага прадпрыемства “Белсаюздрук” А. Валгай адказала Аліне Стэфановіч на расейскай мове, парушыўшы тым самым арт. 5 Закона Рэспублікі Беларусь  “Аб мовах у Рэспубліцы Беларусь”, паводле якога  адказ на зварот грамадзяніна афармляецца на мове звароту.  Такая ж норма, дарэчы, утрымліваецца і ў арт. 18 Закона Рэспублікі Беларусь “Аб зваротах  грамадзян і юрыдычных асоб”.

Акрамя гэтага, у адказе заяўніку не было паведамлена аб прынятых мерах у сувязі са зваротам. 

Аліна Стэфановіч расцаніла такое стаўленне службовай асобы да яе звароту, як дыскрымінацыю па моўнай прыкмеце і 11 лістапада звярнулася ў адміністрацыю Ленінскага р-на г. Мінска з патрабаваннем распачаць у дачыненні да намесніка дырэктара ГРУП “Белсаюздрук” А. Валгай адміністрацыйны працэс, паколькі ў яе дзеяннях утрымліваецца склад правапарушэння, прадугледжанага арт. 9.22 КаАП Рэспублікі Беларусь (парушэнне заканадаўства аб мовах).

Дыскрымінацыя грамадзян, у тым ліку па моўнай прыкмеце, забаронена як Канстытуцыяй Рэспублікі Беларусь, так і міжнароднымі нормамі права ў галіне абароны правоў чалавека, ратыфікаваных Рэспублікай Беларусь, арт. 26 Міжнароднага Пакта аб грамадзянскіх і палітычных правах у прыватнасці.

Адміністрацыя Ленінскага раёна Мінска разгледзела зварот Аліны Стэфановіч і кіруючыся артыкулам 9.24 КаАП (парушэнне заканадаўства аб кнізе скаргаў і прапаноў) вынесла пастанову аб адміністрацыйным правапарушэнні і наклала на А. Валгай спагнанне ў выглядзе папярэджання. 

Пры разглядзе звароту таксама было адзначана парушэнне арт. 5 Закона Рэспублікі Беларусь  “Аб мовах у Рэспубліцы Беларусь” і артыкула 18 Закона Рэспублікі Беларусь “Аб зваротах грамадзян і юрыдычных асоб”, што падпадае пад дзеянне арт. 9.22 КаАП (парушэнне заканадаўства аб мовах). Аднак адміністрацыйнага пакарання па гэтым артыкуле, як таго дамагалася Аліна Стэфановіч, палічыўшы сябе дыскрымінаванай па моўнай прыкмеце, вынесена не было. Відаць пашкадавалі чыноўніцу, паколькі за парушэнне заканадаўства аб мовах ёй пагражала б не папярэджанне, а штраф.

Не пагадзіўшыcя з такой фармулёўкай спагнання Аліна Стэфановіч будзе абскарджаць рашэнне Адміністрацыі Ленінскага раёна Мінска ў вышэйстаячай інстанцыі.

Патрэбна нагадаць, што намеснік старшыні Праваабарончага цэнтру “Вясна” Валянцін Стэфановіч менавіта з выпадкаў дыскрымінацыі грамадзян па моўнай прыкмеце звярнуўся нядаўна ў Канстытуцыйны суд.

Нагодай дзеля звароту сталі выпадкі дыскрымінацыі грамадзянаў па моўнай прыкмеце – у краіне фактычна адсутнічае законатворчасць на беларускай мове. Гэта ўскладняе працэс абароны і адстойвання сваіх інтарэсаў для беларускамоўных грамадзянаў у судзе і іншых дзяржаўных органах.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international