Праблемы журналістаў-фрылансераў абмеркавалі ў Брэсце
Як было адзначана падчас паседжання прэс-клуба, які ладзіўся па ініціыятыве мясцовай філіі ГА “Беларуская асацыяцыя журналістаў”, фрылансеры ў цяперашніх умовах адчуваюць на сабе ціск з розных бакоў і сутыкаюцца з самымі разнастайнымі перашкодамі ў сваёй дзейнасці.
У такой сітуацыі вельмі важна разумець прававыя асаблівасці працы фрыласнсераў, пра што падрабязна распавёў удзельнікам прэс-клуба юрыст Аляксандр Жук. Ён засяродзіў увагу на тым, што патрэбна, каб гэтая катэгорыя журналістаў мела магчымасць легалізаваць сваю дзейнасць у Беларусі, ведала нормы падатковага і працоўнага заканадаўства.
Сябра ГА “БАЖ” Таццяна Бублікава, якая з’яўляецца адзым з каардынатараў медыя-кампаніі “За фрыланс!”, пазнаёміла з асноўнымі напрамкамі гэтага праекту, які мае на мэце юрыдычную, асветніцка-інфармацыйную і кансультацыйную дапамогу вольным журналістам ва ўмвах, што існуюць зараз у Беларусі. Акрамя таго, у Брэсце адбылася прэзентацыя электроннай версіі кнігі “Анатомія фрылансу”, якая стала падсумаваннем супольнага журналісцкага досведу ў гэтай справе, бо многія структуры ў краіне імкнуцца не заўважаць існаванне журналістаў-фрылансераў. У прыватнасці, пакуль не даюць плёну звароты ГА “БАЖ” да беларускага парламенту пра неабходнасць прыняцца заканадаўчага акту, які б прызнаў наяўнасць гэтай катэгорыі журналістаў.
