Барысаў: камунальнікі трэціруюць незалежную газету (відэа)
Галоўны рэдактар «Барысаўскіх навінаў» Анатоль Букас
Калектыў незалежнай газеты «Барысаўскія навіны» вось ужо два дні мучыцца ад «нашэсця» працаўнікоў ЖЭУ-1 Барысаўскага УП «Жыллё».
Спачатку 15 жніўня працаўнікі ЖЭУ-1 Барысаўскага УП «Жыллё» па распараджэнні з выканкама знялі шыльду «Барысаўскіх навінаў» над уваходам у пад'езд жылога дома, дзе размешчана рэдакцыя выдання. А раніцай 16жніўня камунальнікі паспрабавалі дэмантаваць жалезны каркас, на які мацавалася шыльда. Пры гэтым ніякіх пісьмовых прадпісанняў на дэмантаж у працоўных не было.
Галоўны рэдактар газеты Анатоль Букас быў вымушаны выклікаць міліцыю і напісаць заяву. Пры з'яўленні лейтэнанта міліцыі працоўныя сабралі свае інструменты і сышлі, дэмантаваўшы каркас толькі напалову. Варта заўважыць, што Букас падаў дакументы на рэгістрацыю кандыдатам у дэпутаты па Барысаўскай гарадской выбарчай акрузе № 62, таму звязвае гэтыя падзеі менавіта з выбарамі. Да гэтага, нагадаем, райвыканкамаўская газета «Адзiнства» апублікавала бесстаронні матэрыял пра Букаса на сваіх старонках.
«Праваабаронцы за свабодныя выбары»
