viasna on patreon

Пазіцыя праваабарончых арганізацый у сувязі з затрыманнем і заключэннем пад варту Сяргея Сацука

2020 2020-04-03T16:57:00+0300 2020-04-03T13:03:04+0300 be https://spring96.org/files/images/sources/sacuk_zhurnalist.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Сяргей Сацук. Фота Еўрарадыё

Сяргей Сацук. Фота Еўрарадыё

25 сакавіка 2020 года быў затрыманы Сяргей Сацук, журналіст і рэдактар інтэрнэт-рэсурсу "Ежедневник". 26 сакавіка яму была абраная мера стрымання ў выглядзе заключэння пад варту. 26 і 27 сакавіка былі праведзеныя ператрусы ў офісе "Ежедневника" і дома ў Сяргея Сацука, канфіскаваныя аргтэхніка, дакументы.

Падставай для крымінальнага пераследу стала нібыта атрыманне Сяргеем Сацуком больш за год таму грошай за падрыхтоўку і размяшчэнне на інтэрнэт-рэсурсе "Ежедневник" артыкула аб карупцыі. Гэтыя грашовыя сродкі разглядаюцца следствам як "хабар" па сэнсе ч. 2 арт. 430 Крымінальнага кодэкса Рэспублікі Беларусь (атрыманне хабару, за што прадугледжана пакаранне на тэрмін ад трох да дзесяці гадоў пазбаўлення волі).

Сяргей Сацук вядомы як журналіст і рэдактар, які займаецца журналісцкімі расследаваннямі. Адным з яго гучных расследаванняў была серыя публікацый у анлайн-выданні "Ежедневник" аб карупцыі ў сістэме аховы здароўя Беларусі. Пазней у дачыненні да шэрагу высокапастаўленых службовых асоб Міністэрства аховы здароўя былі вынесеныя абвінаваўчыя прысуды за карупцыйную дзейнасць.

Сяргей Сацук заявіў, што атрымліваў пагрозы з-за сваёй журналісцкай дзейнасці, звязаныя з гэтым расследаваннем. З апублікаванага пасля затрымання ягонага адкрытага ліста, перададзенага ў СМІ задоўга да затрымання, вядома, што яму паступалі пагрозы, у тым ліку пагрозы крымінальнага пераследу. Аднак Сяргей Сацук не прадпрымаў ніякіх спробаў змяніць месца жыхарства або схавацца ад магчымага крымінальнага пераследу. Больш таго, як вынікае з яго адкрытага ліста, гэта было немагчыма і з прычыны неабходнасці клопату аб сям'і і, у прыватнасці, з-за стану здароўя жонкі.

Затрыманне ў ходзе папярэдняга следства па крымінальнай справе і ўзяцце пад варту чалавека, які не хаваўся на працягу доўгага часу, з улікам стану яго здароўя і здароўя яго родных, выглядаюць непрапарцыйнымі і відавочна празмернымі мерамі. Гэта можа сведчыць аб наяўнасці палітычнага матыву ў пераследзе журналіста, накіраванага на прымус да спынення або змены характару яго дзейнасці па распаўсюджванні інфармацыі аб карупцыі.

Лічым неабходным неадкладна вызваліць Сяргея Сацука з-пад варты і прыняць усе меры па забеспячэнні яго працэсуальных правоў.

Праваабарончыя арганізацыі працягваюць уважліва сачыць за гэтай крымінальнай справай.

ГА "Беларуская асацыяцыя журналістаў"

ПЦ "Вясна"

ППУ "Офіс па правах людзей з інваліднасцю"

РГА "Прававая ініцыятыва"

Ініцыятыўная група "Ідэнтычнасць і права"

Асветніцкая ўстанова "Цэнтр прававой трансфармацыі"

Экспертна-прававое Таварыства "Ініцыятыва FORB"

РПГА "Беларускі Хельсінкскі Камітэт"

РГА "Беларускі ПЭН-цэнтр"

Установа "Human Constanta"

Беларускі дом правоў чалавека ім. Б. Звозскава

ПУ "Беларускі дакументацыйны цэнтр"

Апошнія навіны

Партнёрства

Сяброўства