Анархіста Мікалая Дзядка не змаглі асудзіць за надпіс на сцяне мінскага інтэрнату Дапоўнена
Мікола Дзядок. Фота: ПЦ "Вясна"
Як стала вядома ПЦ "Вясна", увечары 19 сакавіка актывіста анархісцкага руха і журналіста Мікалая Дзядка затрымалі ў Мінску. Двое супрацоўнікаў міліцыі ў цывільным падыйшлі да хлопца на вуліцы Чайкінай, 16, калі той выйшаў з Новага драматычнага тэатру, і паведамілі, што на яго складзены пратакол па арт. 17.1 КаАП - "Дробнае хуліганства", нібыта за нанясенне надпісу на сцяну інтэрната.
Мікалая Дзядка затрымалі і верагодна адвезлі ў РУУС Савецкага раёна. Аднак дзяжурны РУУС кажа, што актывіста да іх не дастаўлялі. Бліжэй да ночы нарэшце стала вядома, што ён знаходзіцца ў ізалятары часовага ўтрымання, а затрымліваў яго супрацоўнік РУУС Маскоўскага раёна.
Днём 20 сакавіка Мікалая Дзядка наведала адвакатка. Яна паведаміла, што яму ставяць у віну абразлівы надпіс пра міліцыянтаў на вул. Чыгуначнай, зроблены яшчэ на пачатку лютага.
Верагодна разгляд адміністрацыйнай справы Дзядка адбудзецца ў гэты ж дзень у судзе Маскоўскага раёна. Але да трох гадзін дня яго ў суд не прывезлі.
Па інфармацыі тэлеграм-канала MIKOLA, Мікалая Дзядка прывезлі ў суд пасля 16.00. Разглядае справу суддзя Таццяна Мотыль.
- Мікалай Дзядок у судзе 20 сакавіка
З матэрыялаў справы вынікае, што надпіс на інтэрнаце №1 "МАПІД" быў зроблены другога лютага, а Дзядок прыехаў у Беларусь з Польшчы трэцяга лютага. То бок на момант напісання Дзядка не было ў краіне.
Аднак сведка Юлія Бушлякова сцвярджае, што бачыла Дзядка і пазней пазнала яго па фота. Падчас допыту яна кажа, што бачыла Мікалая прыкладна ў 18.15, калі надпіс быў ужо намаляваны. Ён нібыта яе ўбачыў і адышоў да прыпынку ад парапета, дзе быў пах фарбы. Паводле яе слоў, Мікола адказаў, што чакае тралейбус. Калі яна вярнулася з інтэрната з вахцёрам, яго не было.
Затым адвакат Мікалая задае пытанне пра тое, якім чынам сведка давала паказанні.
Бушлякова: "Мне патэлефанавалі супрацоўнікі міліцыі і паклікалі на гутарку і там паказвалі фота некалькіх людей. Там я і пазнала Мікалая".
Яна сама ў міліцыю не звярталася і не бачыла, каб чалавек маляваў, бачыла яго спіну на парапеце. Яна не бачыла яго рукі, і што ён рабіў. Але ўпэўнена на 100%, што гэта Мікола. Ён быў у сіняй куртцы, у чорнай шапцы з белым пумпоном. Відэа з камер яна не бачыла.
Наступным дапытваюць супрацоўніка міліцыі Янчанку, які складаў пратакол. Ён кажа, што заведзеная справа па паказаннях сведкі Бушляковой. Таксама ён рабіў запыт на відэа з камер, але яны былі якраз у гэты час на прафілактыцы.
У выніку суддзя вырашае вярнуць справу на дапрацоўку. Мікола Дзядок на волі.
Распранулі да майткоў і шукалі экстрэмісткую літаратуру. Мікалая Дзядка зноў затрымалі на мяжы
