Праваабаронца са Светлагорска абскарджвае ў судзе адмову ў правядзенні мірнага сходу Аўдыё
Праваабаронца Алена Маслюкова. Фота: belapan.by
16 кастрычніка ў судзе Светлагорскага раёна адбылося папярэдняе паседжанне па скарзе праваабаронцы Алены Маслюковай на рашэнне мясцовага райвыканкаму, які забараніў правядзенне ў горадзе шостага кастрычніка мірнай акцыі супраць працы завода беленай цэлюлозы.
Праваабаронца вырашыла звярнуцца ў суд, бо лічыць, што такое рашэнне парушае канстытуцыйнае права грамадзян на мірныя сходы. І гэта далёка не адзінае адмоўнае рашэнне. Група светлагорскіх актывістаў, у тым ліку і Алена Маслюкова, падалі агулам дзясятак заявак на правядзенне ў горадзе масавых мерапрыемстваў на спецыяльна адведзенай для гэтых мэтаў пляцоўцы – стадыёне “Папернік”, аднак ніводная з іх не была задаволена.
Вядзе грамадзянскую справу суддзя Людзміла Сядзько. На паседжанні праваабаронца звярнула ўвагу на той факт, што прычына адмовы ў правядзенні мірных сходаў на стадыёне “Папернік” практычна заўсёды адна і тая ж: правядзенне ў патрэбны час спартовых мерапрыемстваў ці трэніровак.
Але, напрыклад, шостага кастрычніка і менавіта ў той час, на які актывісты падавалі заяўку (каля 16 гадзін), на стадыёне нічога не адбывалася. У пацверджанне сваіх словаў Алена Маслюкова прадэманстравала відэа і фота з пустога стадыёна. Суддзя, у сваю чаргу, выслухала ўсе прэтэнзіі і довады Алены.
- Такі адказ праваабаронца атрымала ад райвыканкаму на заяву аб правядзенні мірнай акцыі. Фота Алены Маслюковай
- А вось, што на самой справе адбывалася 6 кастрычніка ў запланаваны час на стадыёне "Папернік". То бок нічога
Па словах Маслюковай, падчас паседжання суддзя рабіла выгляд, што будзе сур’ёзна разбірацца ў гэтай справе. Аднак спадзеваў на тое, што справа будзе вырашана на карысць заяўнікаў, праваабаронца не мае.
“У нас ужо ёсць “сумны досвед”, звязаны з суддзёй Сядзько. Справа ў тым, што ў чэрвені яна адмовіла з задавальненні нашай падобнай скаргі па справе аб забароне пікета ў падтрымку Федыніча і Комліка. Гэта рашэнне затым абскаржвалася ў Гомельскім абласным судзе, а зараз пададзена скарга ў Вярхоўны суд. І я планую давесці справу да Камітэта па правах чалавека ААН”, - распавяла праваабаронца.
Наступнае пасяджэнне па справе адбудзецца 31 кастрычніка ў 14.30 .
